ZALEN July 4, 2025 : Mizoram Teachers' Federation (MTF) chuan nimin khan Synod Conference centre-ah General Conference an hmanga a, rorel an neihah sawrkar school te uniform inang vek hak chu tha lo an ti a, mahni duh anga kalpui leh an duh. School academic session pawh thlak nise tiin an rel.  

Mizoram Teachers Federation khawmpui chuan a hnuaia mi ang hian thutlukna an siam :

1. Sawrkar enkawl schoola thawktuten thahnem ngai leh zualin zirtir țheuh ni rawh se.

2. Sawrkar enkawl School te sawrkarin thuamthain ngaihlu lehzual rawh se.

3. Headmaster leh Teacher Selection Grade a kum 10 awm tling tawhte tan Upgradation/Special Grade siam ni rawh se.

4. Academic Session hi January- December in kal leh ni rawh se.

5. Sawrkar School ram tun aia nasa lehzualin humhalh ni rawh se.

6. Sawrkar enkawl School a common Uniform hman mek hi schoolin an duh anga kalpui leh ni rawh se.

7. Zirtirtu post ruak tam lutuk hi rang taka sawrkarin a hnawhkhat zel rawh se.

8. MTF hian Mizoram pum huapin Ruihhlo dona nei turin hma la rawh se.

9. School Education Dept. Officer entry grade atana Circle Education Officer lak hi tihtawp ni tawh rawh se.

MTF ah hian Service Association 11 an awm mek.