ZALEN April 23, 2025 : Serchhip Kawnpui VC Hall ah vawiin khan 'Serchhip District chhunga MNF VC tling tharte chawimawina hun' hman a ni. He hun hmanpuitu MNF Vice President Lalchhandama Ralte, Leader of Opposition ni bawk chuan ZPM chu chhum rei lote lo langa ral leh tur ang hi an ni a ti.

Leader of Opposition chuan Sawrkarna chelh mektu ZPM Party chungchang sawiin, "Opposition an nih lai khan Sawrkar kalta zawng zawng tlin lohna leh hmelhemna kher chhuakin, social media-ah an rak chuah chuah a. Tha bik nia insawiin, kohhran leh pawl dang behchhanin Pathian ram din tur anga intiam an ni a. Sawrkar kal tawh an selte ai mahin an fawm tawp a, party induhsak bikna kawngah nise a che-na na an ni ta a. Mi tam tak beidawng leh sawrkar hnathawkte beng tithleptu an ni mek thung," a ti.

MNF Vice President chuan ZPM chu Nationalism kengtu nia insawi kha an ni a, an sawrkar hnuah nationalism nekpuar thil a thleng fova, chutih hunah chuan hnam tana an din ngam lohzia a lang ta zeuh zeuh a. Thil fuh lo a awmin sawrkar kal tawh an mawhpuh a, a tha lamah anmahni thawh angin an sawi leh thung a. Mawhphurhna la ngam lo sawrkar kan hrawn mek a ni. NGO ten he sawrkarah hian mak tih an ngah, an beidawng, an ring tawk lo mek tih sawiin 'ZPM hi chhum rei lote lo langa ral leh tur ang hi an ni,' a ti.

Lalchhandama Ralte chuan, "ZPM sawrkar hneh taka an tlin hnu lawka VC inthlana kan party mi tling tharte chawimawina hun buatsaih a ni hi lawmawm ka ti a. Opposition kan ni chung hian kan phurtlang em em a ni tih a chiang. MNF-te hi khawiah mah mikhual cheta che tur kan ni lova, ram neitu dik tak kan ni. VC inthlan zawh takah MNF-in hnehna pangngai taka kan chang hian ram neitu kan nihzia a tichiang a ni," a ti.

Kalkhawm mipuite fuihna sawiin, "MNF hian hruaitu nei tha ber kan ni tih i pawm ang u. Ram leh hnam tana bei a, thatlai hun zawng zawng hmang ral hruaitu kan nei. Pathian hian a hun takah min hruai chhuakin, chakna min pe leh dawn" a ti bawk.

Serchhip District chhunga MNF VC tling tharte hi an vaiin 61 an ni. Lalchhandama Ralte bakah Er.Lalrinawma, Lalremruata Chhangte, J.Malsawmzuala Vanchhawng leh Lalawmpuia ten thu an sawi a, VC tlingtharte Chawimawina thuziak an hlan a ni.