ZALEN February 7, 2025 : MPCC Spokesperson Dr. Lallianchhunga leh Aizawl District Congress Committee (ADCC) President Lalhmingthanga Pachuau te chuan Thingsulthliah a Sawhthing lei khawmna hmun, Secondary Collection Centre an tlawh a, ZPM-in research based an tih chu a hlawhchham chiang an ti.

Sawhthing chingtute nen inkawm hun an nei a, Sawhthing chingtute nena an inkawmna atanga an thil hmuh dan sawiin, Dr. Lallianchhunga, MPCC Spokesperson chuan, “Thlai thlan bik lei tura an intiamnaah ZPM te Research based an tih hi a hlawhchham chiang hlein kan hria. ZPM Research based in Hmunphiah leina atana hun tha pawh an hre lo va, Sawhthing leina atan hun tha pawh a liam leh tep tawh."

"ZPM te hian Road Map mumal an lo nei lo. Mipui nawlpui te awih atan sap tawng thumal an hmang mai mai a ni. Market a inrawlh dan tawk an thiam loh avangin kuthnathawktuten an thil thar chhuah hralhnaah tun hma an pha lo zawk. Ruah tui tlak hma ngeia kuthnathawktute Sawhthing lei vek turin ruahmanna an la siam lo niin kan hre bawk a. ZPM te hian Sawrkar kal tawh te tawngkam thiam taka sawisel bak thiam an nei lo em ni chu aw, kan ti,” a ti.

Thingsulthliah tlang dunga kuthnathawktute an kawmnaah hian ADCC President Lalhmingthanga Pachuau chuan, "Thingsul tlang dungah hian Sawhthing ching an tam lo va, kuthnathawktu thenkhat te pawhin ZPM sawrkar policy an chhawr vakna tur an hriat loh thu an lo sawi a, NLUP kha an tangkaipui zawk thu an sawi a ni. Chutihrualin, sawrkar chu kan ram nu leh pa a nih angin, Mizoram khaw hrang hranga kuthnathawktute an beidawn loh nan, an hah man phu tawk zela an kut kawih hnathawh hah man an hmuh ngei theih nan chak taka hmalak pui tul," a ti.