ZALEN July 14, 2025 : BJP Mizoram chuan vawiin khan karthar inhlanna leh Political Session hun an nei a, he huna thusawitu K. Hrahmo, MLA chuan BJP leh a thawhpuite sawmna ZPM sawrkar hian issue based ni lovin zawm mai sela chuan Mizoram-in sum-ah harsatna a tawh a rin loh thu a sawi.

Palak bialtu MLA K. Hrahmo chuan, "India rama BJP leh a thawhpui te'n sawrkarna an siam dawn khan keini state pawh sawrkara tel ve tura sawm kan ni a, nimahsela kan sawrkar hrawn mek ten kan hotute sawmna chu Issue based-a an Support tur thu an puang ta a, khang hunlai khan kan Sawrkar hrawn mek ZPM hian issue based ni lovin lo zawm mai sela chuan Mizoramin tun huna suma harsatna kan tawh mek te, Mizoram tana policy an duan pawh tuna mipui dem luai luai tawk lo leh fakna tawngkam tam tak an dawn theihna kha an tichhe ta a ni." 

"Chu mai bakah Mizoram khan Union Minister neih theihna hun tha tak leh Kristiante tan mai bakah State pawn Missionary-te tan pawha rawngbawlna atana min puitu tur a nih a beiseiawm vei nen a pawi takzet a ni. Chuvangin kan state-a sawrkar mek te'n Issue Based-in central sawrkar kan support ang an lo ti si a, central lam pawhin Issue based tho bawkin min lo support nge ni? kan state sawrkar hi a rethei ta hle mai hi a pawi hle a ni," a ti.

BJP Mizoram dinhmun sawiin K Hrahmo chuan, "Mizoram mipui te'n BJP min hmuh dan a that loh hle laia, Aizawl khawpui chhung atanga mi 228-in BJP an rawn zawm hian, BJP that zia leh BJP-ah mipuiin rinna an nghah nasat tawh zia a tilang chiang hle a ni tih a hriat a, BJP hi hlauh chi a nilo a nih lohzia leh Development Party kan nihzia an tilang chiang hle a ni," a ti.