ZALEN April 22, 2025 : MNF Senior Vice President, Dr. R. Lalthangliana leh MNF General Headquarters hruaitu engemaw zatte chuan vawiin khan Zampui Phuldungsei tlawhin Tourist Lodge-ah Mizo Convention Zampui aiawhte leh Tripura Group YMA aiawhte nen inkawmhona an nei.

Dr. Thangtea chuan ZPM sawrkar lo lang ve zawk mek hi a thatna lai a awm ve tho nia sawiin, "Thil tih theih loh tawp tur zuarin 'min enchhin rawh u' an ti reng a. Kum khat leh a chanve vel an sawrkarah hian kut hnathawktute an mangangin anmahni ngei pawh an mangang tan tawh a, a sawi a sawi ringawt ni lovin an ze dik tak mipuiin an hmuhna hun remchang tha tak a ni a, a dawt lehah chuan MNF bawk hi kan sawrkar leh ngei dawn a ni," a ti bawk.

MNF Senior Vice President Dr. R. Lalthangliana chuan, "MNF-in a ngaih pawimawh hmasak ber chu Zofa khawvel hmun hrang hranga awmte insuihkhawm leh tha taka impumkhat hi a ni a. He lai tlangdunga in harsatna hi MNF chuan chhete mahin kan tlanchhiatsan ngailo ang che u. Vawiinah hian political advantage la tura lokal kan ni lova, Mizo hnam party, hnam thluthlunga ding kan nihna anga lokal kan ni zawk. Kan term kal ta khan pawisa remchang kan dap a, Thaidawr tlangah Tawngtaina in sakna tur Trade & Commerce atangin cheng nuai 20 vel kan pe che u a, Pu TJ.Lalnuntluanga Transport Minister anih lai khan Zampui tlangdung thlengin MST Bus a service tir anih kha," a ti.

"Covid laia Health Minister ka nih lai khan heng lai hmuna in dinhmunte ngaihsak turin Tripura Health Minister pawh ka rawn be fo a. Mizoram hi in inpui ber kan nih avangin, koh ei theihin kan awm reng tur a ni tih chu MNF ngaihdan a ni. He laiah tun hnaiah Minister leh MZP-te pawh an lokal tih kan hria a, an chungah kan lawm hle a. Mangan ni leh lawm lai nite kan nei fo ang a, tha taka inbe pawp tawn zelin, vawiina kan inhmuh khawmna hian rah tha tak a chhuah ngei ka beisei a ni, a ti.

Tripura Group YMA President Lalnunfima pawhin MNF sawrkar khan he lai hmun hi a ngaihsak thu leh Dr. Thangtea hian an sawrkar laia YMA office a dinsak thu leh an dinhmun hrang hrangte a sawi." Pu T. J. Lalnuntluanga hian Transport Minister anih laiin Zampui tlangdung thlengin inpumkhatna MST Bus tlan tirin sum faiin kan hmalaknate min pui a, kan lawm hle a ni," a ti. He laiah hian Darlawng Hnam unaute nen tun thlengin buaina neuh neuh an neih thin thu a sawi bawk a, MNF hruaituteten a hmun ngeia an tlawh chu lawmawm a tih thu a sawi.

Mizo Convention aiawha thusawitu President JD.Mawia chuan helai Phuldungsei hi kum 1912-ah din a nih thu sawiin, kum 1980-ah Mizo Convention hi hnam leh hnam inkarah buaina a chhuah avanga din anih thu a sawi a. Kan Bru unaute hian Thaidawr tlang hi kan Pathian awmna ram a ni tiin an sawi ve tlat a, buaina neuh neuh kan nei thin. 'Mizoram hi kan Jerusalem a ni' tiin kan ngai hle thin. Kan dinhmun hi Mizoram sawrkar tan pawh a buaithlak thin khawpin kan hria, a ti a. MNF hian hnam inpumkhatna an ngai pawimawh tih sawiin, Zampui-ah MNF-in VC an dinsak chu official-a pawm a ni tawh avangin an lawmzia thu an sawi bawk.