ZALEN April 19, 2025 : ZPM Thalai chuan India ram state hrang hranga Sawhthing rate enin kumin hi Mizoram-ah sawrkar hmasa te hunlai a thil thleng nise Sawhthing dah kumhlun kum tur ni ngeiin a lang an ti.

ZPM Thalai chuan, "Sawrkar-in kut hnathawktute harsatna hria in Rs.50/kg in Sawhthing hi a lei mek zel a, hemi kawngah hian Kuthnathawktute duhthusam kan tlin lohna lai tam tak awmin, a chinfel dan kawng theihtawp chhuaha dap zel tu Agriculture Minister PC Vanlalruata hmalakna hi fakawm kan ti a, April 21, 2025 atanga sawrkarin Sawhthing a lei leh turah hian kuthnathawktute hasatna engemaw chen a phuhruk turah kan ngai a ni," an ti.

Congress hmalak dan mak an tih thu sawiin, "Tunhnaiah MPCC Treasurer Dr. Lalmalsawma Nghaka chuan Agriculture Marketing Board in Sawhthing a lei sa FCI Godown-a dahkhawm mek tender zawh loh la bang awm te chu Kuthnathawktute Sawhthing la hralh loh dah khawm emaw tiin a zuk tlawh a, NLUP an mualphopui chunga 'Congress-in an Policy a ti hlawhtling thin' a ti hi MPCC Treasurer hi a tawng vai ta mai em ni? tih hi ZPM Thalai zawhna a ni a, Congress Party-a an Senior te pawn lo hrilh hria se tih hi MPCC te kan thurawn a ni bawk a ni," an ti.

ZPM Thalai chuan, "Kan ram politics-a ‘Sem Policy’ rawn tichhuaktu chu Congress Party hi ni in, Kum 1989-1998 thleng chhung NLUP hnuaiah Rs 30,000 sem an zuar a. Kum 10 chhungin chhungkaw 54932 hnenah RD Block 12-ah chauh an sem hman. RD Block 9 – Bunghmun, Hnahthial, Darlawn, Lawngtlai, Chawngte, Sangau, Aibawk, Tuipang leh Phullen-ah te hian cheng khat mah an sem hman lo. Kum 10 chhungin Mizoram-a chhungkaw zatve pawhin an dawng hman lo a ni tih kan han hrilh hre leh duh a ni," an ti.

MPCC in 2008-a Sawrkarna an chan leh hnu khan Kum 2012-a Synod Social Front-in NLUP zir chianna report an thehluhah chuan, beneficiary 29.4% te chu anmahni duhthlan Trade ni lo pek an ni a, beneficiary 88.6% te chu Congress Party an ni a, Rs 1,00,000 a kima dawng chu chhungkaw 7 chauh an awm a ni, an ti.

ZPM Thalai chuan, 21.3.2017 Budget Session-ah khatih laia Chief Minister Lal Thanhawla chuan, “NLUP hi a hlawhtling lo a nih pawhin, keini chu kan hlawhtling, kan hlim em em a ni,” a ti thung a nih kha.

Ni 25-5-2017 Session-ah CAG Report pharh a ni a. CAG Report-ah chuan hetiang hian a in ziak a ni ;

a) NLUP thiltum 4 - Tlangram lo neih tihtawp, khamkhawp buh thar chhuah, Mizoram 80% ramngawa siam leh ram leilung hman dan tur duan fel tihte chu pakhat mah a hlawhtling lo, tih te,

b) Beneficiary 7942 an kawm zingah NLUP dawng ve thei lo tura ngaih chhungkaw 1400 in an dawng ve tih te,

c) Beneficiary 9% chauhin an hlawhtlinpui tih te,

d) YMA-in Baseline Survey hmanga khaw 813 atanga Beneficiary tur an thlante chu NLUP Apex Board-in a hnawl tihte a chuang a ni.

ZPM Thalai chuan, "Zoram Kuthnathawktute hi, Sawrkar hmasa ten an lo ti beidawng tawh thin a, Chemtum leh iptepui nen kawng hial an lo zawh tawh a nih kha, Chief Minister Lalduhoma leh Agriculture Minister Pu PC Vanlalruata Kaihhruai ZPM Party-te erawh chu kan Policy Kuthnathawktute tan kan dinna ngaiah kan la ding reng dawn a ni tih hi Kuthnathawtute kan chah duh a, Thlamuang taka awm turin kan chah duh bawk a ni," an ti.