ZALEN July 17, 2025 : MPCC Media Department chuan vawiin khan Aizawl Press Club-ah chanchinthar lakhawmtute an kawm a, he hunah hian an Spokesperson Dr. Lallianchhunga chuan ZPM sawrkar hnuaiah Restricted tender hmangin cheng vaibelchhe 945.55 chuang contract pek a ni a ti.

Dr. Lallianchhunga chuan Eptu party an nih laia ZPM party hotute’n an sawisel nasat em em chu MNF hnuaia 'Restricted Tender' an pek dan kha a ni. Mizoram mipui mak tih khawpin MNF sawrkar khan a duhsak zawngte Restricted tender hmangin hna a pe a. Congress party leh ZPM ten nasa takin MNF sawrkar hnuaia Restricted Tender inpek dan kha an sawisel reng a. Congress party phei chuan khatih laia kan President Lalsawta hovin Press Conference an nei a, Danin a phalsak chinah chauh Restricted Tender chhuah a nih tur thu a puang hial a ni.

"ZPM Leader Lalduhoma pawhin MNF sawrkar hnuaia Restricted Tender inpek dan chu nasa taka sawiselin, MNF sawrkar hnuaia sum leh pai harsatna nen a sawi zawm a, ‘Restricted Tender ringawt pawh kan tih ve loh hian kan sum dinhmun chu, chu chuan nasa takin a siam tha nghal ringawt a ni” (24th Aug.2023 ZPM Campaign Kick Off @ Vanapa Hall) a ti a. Assembly House zahawm tak chhungah ngei pawh ZPM Leader Pu Lalduhoma hian, “Restricted Tender inpek hian dan 5 pawimawh tak tak a bawhchhia a ni. Pakhatna, Rule 162 General Financial Rules; pahnihna, Rule 16 Public Procurement Rules; pathumna, Central Vigilance Commission Circular No.04/04/21; palina, Art. 14 of Indian Constitution; pangana, Supreme Court Ruling SPL Civil No.10174 of 2006. Heng zawng zawng hi Mizorama Contract kan inpek dan hian a bawhchhe par par a..” a ti a ni," a ti.

MPCC Spokesperson chuan, "Hetiang khawpa an sawisel hi ZPM Enchhin sawrkar chuan sawrkar kal tawhte aia uar leh nasa zawkin a kalpui ta hmiah hmiah mai a ni. Sawrkar document kan hmuh theih aṭanga a lan danin April 17, 2025 khan SASCI 2024-25 hnuaia hna cheng vbch 629.17 man chu Restricted Tender hmanga an duhsak zawng te an thawh tir theihna turin Department te chu 'Blanket Approval' a pe a, Eptu party an nih laia an thusawi nen a inkalh chiang hle. RTI chhanna atanga a lan danin ZPM Enchhin sawrkar pian atanga April 29,2025 thleng khan Restricted Tender hmangin hna lian tak tak 47, cheng vbch 316.38 (Rs.3,16,38,35,821) chuang man a pe chhuak tawh a ni," a ti bawk.

Kum 2023 MLA Inthlanpuia ZPM Manifesto ‘Sustainable Development & Reform Policy (SDRP) Chapter IV (B) ah “Contract hnate a tam thei ang ber Open Tender-a koh thin a ni ang” tih a awm a. Chapter IV (C) ah, “Loh theih loha Restricted Tender-a thawh ngai a awm a nih pawhin, dik taka dàn zàwm thlapa tih a ni ang,” an ti bawk a ni. An Party Manifesto ngei pawh palzuta ZPM Enchhin sawrkar in Restricted Tender a kalpui dan hian sawrkar belhchiandawl leh rintlak tak a nih loh zia a tilang chiang hle a ni, MPCC chuan an ti bawk.