Zawhna: Mipa kum 81 ka ni a, sex lamah hian ka chak lova, a damdawi a awm em? Ka natna chu blood sugar leh prostate a ni e. BP sang ka nei bawk.

Chhanna: A hmasa bera ka sawi duh chu mipa min ti mipa tu chu sex hman kawngah hian ani kan ti thei ang. Hrisel tha pangngai kan nih chuan kum 60 pelh chhoh ah pawh nupa nun hman kawngah mipa te hi an la active thei reng a. Kum 80 pelh tawh hnua fa nei leh te pawh an awm reng a, Bible ah Abrahama chanchin han ngaihtuah phei chuan Pathian hian min lo siam ropui hle mai a tih loh theih loh.

Sex hman kawngah hian kan taksa peng leh organ inrawlh a tam hle a. Thluak leh thazam (nerve) lam a pawimawh a, thisen semdarh kalkawng (blood circulation) a pawimawh leh hle bawk a. Tin, mipa hormones bik Testosterone level hi a pawimawh em em bawk a ni. Heng thil hrang hrang hi a inkungkaih kual vek a. Mipa thluak lama ngaihtuahna intan chuan thisen che vel ti tamin chu chuan sazu a rawn ti fuk a, sex hmang turin a inbuatsaih ta thin a ni.

Mipa hi kan kum a lo tam hian kan Testosterone hormone level hi a lo tlahniam ve hret hret a. Sex drive (tisa chakna) pawh a lo tlahniam ve hret hret thin bawk. Physical activity kan lo nei tlem a, kan taksa khawl (metabolism) a rawng muang chho tial tial bawk a, chu chuan loh theih lohin sex drive hi a rawn nghawng lo thei lo a ni.

Chuti chung chung chuan mipa hrisel tha pangngai ah chuan kum tam tawh mahse an sazu a la fuk theih chhung chuan nupa nun hi an la hmang thei reng a. Hmeichhe lam zawk hi an thi a hul hnu hian an serh chhung ti naltu a lo tlem a, an hormones a lo tlahniam a, mipa aiin sex drive lamah an hniam chak zawk a. Chu chuan sex hman chak lohna a thlen fo thin a ni.

Kan sawi tak hriselna chungchang hi sex drive atan a pawimawh hle a. Chuvangin natna, a bikin zunthlum (Diabetes) leh thisen/BP sang (hypertension) te hian kan nerve leh thisen zam te a tih buai avangin sex drive pawh a nghawng duh hle a. Tin, mipa in kan neih bik, kan phing (bladder) hnuaia thal chi khat (prostate) hi kum a lo tamin a lo thang thin a. Chu chuan zun lamah harsatna a rawn thlen thei bawk a ni.

Heng a chunga natna kan sawi nei miah lo ah pawh, rilru lama stress tam vang te hian tisa chakna hi a tlahniam fo thin a. Thau lutuk (overweight) te, zu in nasa te, mei zu nasa te, zan mu tha lo hian sex lam chak lohna hi an nei duh zual bawk. Chutiang avang chuan hriselna lam ngaih pawimawh hi sex drive pangngai tak nei tur chuan a pawimawh em em a ni.

Ka pu hian zunthlum, thisen sang leh Prostate thang i nei tih i rawn sawi a. Enkawlna i la turah han ngai ta phawt ila. Heng natna enkawlna atana hman damdawi thenkhat te hi sex drive ti hniam thei, sazu fuk tha thei lo thlen thei an awm ve thin a. I damdawi ei vang te pawh ani thei bawk a. Tin, sex lama chak lo te tana damdawi an hman thin hi lung tha lo, chak lo te tan chuan a him lo thei bawk nen. I doctor rawn hmasak a pawimawh ka ti hle.

Eng damdawi pawh mai hi side effect nei an ni a. Senior doctor pakhat sawi dan takah phei chuan “side effect nei lo damdawi” tia an rawn promote reng reng hi chu ei loh a tha ber; effect pawh an nei tak tak lo, a ti hial. Chuvangin sex lam harsatna nei kan nih chuan keimahni thua thiante emaw hmelhriatte tha tih vanga damdawi lo ei ve thawr hi a him lo a ni tih kan sawi tel duh a ni.