Kum 16 lai a liam ta reng mai; rilruah a thar leh thìn—kan nghahhlel êm êm kan nghah chhuah zàn, September 19 zàn leh, a tûk—kan lungngaih ber ní a inzui zat tum kha! Lal Davida ang maia Zàwlneiin a khak ngai hial khawpa fapa sún te pawh ang ka inti rum rum thìn. “Êm êma!” min ti a nih paw’n a àwm lo lo e. Tün tumah pawh hei, tum dang aia thuia ka ziah leh tâk pek hi!

Kum 16 kaltaa kan fa hmuh hmasak ber tùr pian ní tùr leh ka pian cham a inrual a beisei thu daktawrin min hrilh khán, phùr naménin kan phür lo a nih kha…

Inbuatsaihna hlimawm

Inneih hlim hi chuan engkim mai hi a ëng sút vek mai a! Kan hma lawka kan fa hmasa ber lo piang tùr kan han hmuak zui zat phei kha chu, khawvêlah hian ka awm lo ang tih hial hial te kha ka hlauin ka hre hial nia!

Chhuahna apiangah naute thar thawmhnaw tùr kan melh a. Chhúngten, “A tâwk tawh êm êm e; a zah te pawh a zahthlâk zozai e a…” min tih tawh hnu paw’n, “Hmeichhia a nih chuan…” tia a Barbie leh teddy bear tùr chi tinréng melh kan chàwl chuang lo a. “Mipa a nih tâk hlauhin…” tiin a toys tùr; a leikàn deuh huna a pèt tùr ball leh a kum nga tlin huna a birthday present tùr, tiin naupang football boot leh Manchester United jersey sen ka la leisak tak hräm hräm kha a ni a! A puan tùr ringawt pawh, a chhang lìna thleng hman tùr daih kan lei hial ta ve ang!

A hlim lah kan hlim. Chhúngten an lo hmuah ve rauh rauh, “Mo neihchhun” chu an han hmuak thleng ta phawt a. Chutah, “tu” hmuahin a chhunzawm zat kha a ni a. Chhúngkaw chaw ei te kha a tui vek mai a. Naute neih a hnai tial tial a, chhúng inkhâwm te thleng thleng khán a rei ang telh telh a. Kan phun ngai chuang rëng rëng lo a.

Ka thawhna sikulah lah, naupang hrem hrât ber thìn khân naupang hrem leh hauh ka báng a. Chutih rual erawh chuan, naupang sikul báng tùr bàn khalh ngawt ka chíng thar thut thung! Chu lo lehah, bag a rit häw ta ziah bawk—coconut pum hring ah hàw ngai ziah tawh hek!

Khâng hun lai, kan fa hmasa ber pian hma khán—engkim mai kha kan rèl leh ruat anga awm; kan kawng te kha tluanga mám purh reng; kan beisei leh kan duh dàn ang anga thil lo thleng; kan thu thua khawvêl inher emaw kha kan ti nge maw’n le … khati tak maia kan “khatih êm êm” mai kha le…?

Damdawi in lamtluang

Kum 2019 September ni 19, Inrinni a ni a; sikul chawlh a ni. Chawlh ni lo pawh ni se, ka chàwl àwm tho êm mai a! Daktawr sawi anga ka nupui chu nau nei tùra damdawi ina admit a ngai miau aläwm maw le!

A tûk, September ni 20 chu ka pian cham kum eng emaw zahna tùr a ni. Chumi ní chu kan fa tìr pian ní tùra daktawr beisei ní chiah a ni. Birthday hi vawi duai lo ka lo làwm ve tawh a; min tâwmpuitu lah mi mataduai tél an awm ve. Mahse, hemi tum ang rëng rënga phùr leh nghahhlelh hi ka nei ngai lo. Keimah lam vàng ngawr ngawr a ni lo; pian cham min tâwmpuitu tùr “mi thar lo piang tùr” vàng zâwk a ni.

Daktawr sawi angin zanriah ei khamah, kan taxi hman thiam RD-a taxi ngei mai hmangin damdawi ina naute nei tùr chuan kan inphur chhuak ta kha a ni a. Kan han phür na lailéng nupa khawp a! Ken malék loh tùr suitcase te, hman miah loh tùr bungrua te; a la khalh miah loh tùr a toys báwm chawp chawpin, a … a kum khat tlin lawmnaa a hâk tùr hmeichhe naupang leh mipa naupang thawmhnaw thleng thlengin maw le—bang-báwr mangkhèngin kan inkeng chhuak lúk lúk a nih kha. A walker tùr kan keng tel loh chauh! Kum khat chuang thang boa zin tùr emaw, damdawi ina chám hlen tùr emaw te pawh kha kan ang deuh roh ka ti—tùn hnu hian!

Kan bungrua leh kan chhúngkua chu … han ti thla rawk ila—ka nupa leh kan fa tìr tùr, kan nu pum chhúnga la awm rihte nèn chuan, taxi-ah chuan kan khat dêr—kan leng lo têp zâwk!

Tùna taka!?

Kan thleng a. Kan awmna tùr, kan hauh sa cabin-ah chuan kan han inpu lût ve rawih a. Rei lo te hnuah dâktawr chuan min rawn kan thuai a.

Kan nu pum chu dapin naute thäwm te chu daktawr chuan a’n ngaithla vêl a. E he le! Daktawr nu mit mengah chuan thil a fel zân lo tih ka hai lo!

‘In hnuaiah chhuk ang. Ultrasound-a en a ngai tlat!’

Ultrasound kháwl awmna chu kan pan nghâl chúk chúk a. Ngaih hi a tha thei tlat lo! A hma ní Zirtàwpnia kan nu a inentírin, daktawrin eng mah a sawisël lo a; sawisèl ahnêkin, ‘A pa nèn birthday an intâwm thei ngei dáwn e. I la vei lo a nih pawhin nau nei tùrin Inrinni zànah in lo lût dáwn nia,’ tiin hlim takin an inthlah kha a ni si a. Engtia en that leha fel lo nge a nih theih? Enga tùna taka kan buai tâk thut?

Zai mék nghâktu nun

Zêp loah chuan ka mangang a ni—kha dárkárah khán! Daktawr lah chu a ngawi kar tawh bawk si! Chutah, pindanah kan nu a kai chho. Keiin ka chhawm. Khuma kan thut fel hnu chuan zawi tê, fiah zet hian: ‘Naute lung hi a fel lo a ni,’ a ti muang ban ta charh a!

Damdawi in kan luh hlima kan nu hnêna, ‘I nau kha tum hnih kan zai a; nang chu neih pangngaiin i nei thei ang chu,’ tia min lo làwmtu daktawr tho chuan, ‘Kan inzai a ngai nghâl chúk chûk dáwn! Zira, i chhúngte hrilh nghâl vat rawh!’ min ti ta si a! Chutih lai tak chuan, boruaka ka in sáng sak mék chim rum rum thäwm chu hre theiin ka inhria!

Nurse-te nèn lehkha an buatsaih a. A hnuah, ‘Hetah hian i hming ziak rawh le. Inzai remtihna lehkha,’ daktawr chuan a ti a. Lehkha chu kan chhiar chhuak. Hming kan ziah hnan zui a.

Zàn dár 7 a pèl âwrh ang, inzaina pindanah chuan an innawr lût ta a nih kha. Mahniin, keimah chauhin, inzaina pindana an nawr luh, zai pui hma chhawn tùr ka nupui chu ka lo nghâk ta ràn mai a nih chu. A nuam miah lo! Ka “mi mal” ngawih ngawih a; ka nuna “mahni chauh” ka nih ber tum niin ka inhre hial! Khatih lai boruak rit zet mai kha, he ka nun hian a ngai leh ngai tawh miah lo!

Ka tih theih awmchhun chu, tawngtai … leh, kan chanchin phone hmanga chhúngte hrilh chu a ni mai. Rilrua tawngtai mawlh mawlh chungin chhúngte ka be kual a. Rei lo te hnuah mal nghah mai loin chhúngten min nghahpui ve ta.

“A lo la chhuak lo!”

Dárkár khat a liam, rei fé hnuah dárkár hnih! Minute khat pawh rei tih tawh nâk laia, chutiang chen chen han nghah mai chu! Ka rilrua phùrna leh helhhawlhna awm zawng zawng pawh kha, hlauhthàwnnain a rawn chîm hlup tawh a, awm a nuam thei tawh lo a ni.

Chhúngte leh thiante rawn inthlen chhâwk tak tak chuan zawhna pakhat an rawn inken chhâwk a. Chu zawhna ka chhànna chu: “A lo la chhuak lo!” tih zawng a ni!

Dár 10 a ri dáwn hnai tawh tihah nurse pakhat a lo chhuak zawk—chanchin làwmawm êm êm min rawn thlentu chu! Ani chuan, ‘Fapa in nei e!’ tih thu, vàn angel-te puan tluka mawiin a rawn puang ta a nih chu!

Thu làwmawm rawn thlentu chu inzaina pindanah lût leh daih mah se, a thu rawn thlen erawh a ri a ring tulh tulh thung. Unauten min chibai sap sap pahin, ‘Pa tak tak i ni dáwn zu nia le!’ tiin lawmpuina chibai min bûk sap sap hlawm a. Chu hun rei lo te chhúng chu, “Khi-súnga” ka ni ve!

Sana bán chek riin beng a khawrh tan leh ta tlut tlut mai! A chhan chu, “An lo la chhuak tlat lo!” 

Nau nei, hrin pangngai ni loa a zaia zai chhuah hi, páwnah an chhúngte ka nghahpui ve ta nual ta. Heti chen chen kan nghah ka hre ngai lo! Mahse, keini chu, thil fel lo a awm avànga hmanhmawh taka zai kan ni miau a! Lo vuia lo phun thei ka ni tlat lo.

Kan fapa chu!

Zàn dár 10 a pèl ta—an la rawn chhuak chuang lo! Dárkár chanve dáwn hnuah daktawr a rawn dâk dêk dêk. ‘A pa leh mi dang pakhatin rawn en lawk rawh u,’ min rawn ti ta. Ka nuphalpa nèn kan va lût a…

A nu’n a pai laia an en chhin dàn kha chuan kan fapa chu kg thum pèl vai vaia lo piang tùra beisei kha a ni ve a. Mahse, amaha “fel lo” chu a lo fel lo tak tak viau mai—kg hnih pèl âwrhin a lo piang chhuak a nih chu! A hmél ka en a. Khawvêla nau piang hlim duhawm ber leh hmel tha ber ka hmu! Mahse…

Ni e, amaha “mahse” chu a lian hle si a; keimaha “mahse” pawh chu!

Kan chhuahsan leh thuai a. A hnu lawkah a nu chu an rawn nawr chhuak. Khuma kan nghah hnuah naute pawh an rawn pawm chhuak ve a. A nu kiangah chuan a muhil ve sék sék mai. Ka en reng a. A hnuah pawh ka thlír leh thìn. A lo tah deuhin min riahpuitu ka pizawn chuan tuisik a tulh mai a, a báng ve leh mai thìn.

Zanlai a pèl a. A nu chu a la harh lo. Hnute tui lah a nei hek lo. Naute chu a rawn tap leh a. Tusikin a tlei duh ta tlat lo mai! Ka pawm a, ka awi a; a tlei thei chuang lo! A pi nèn kan buai! Nurse-ten an rawn ngaihven a. An pindanah an la lût daih! A hnu lawkah daktawr chu phak tak maiin, a mu tawh hnu an phone tho tih hriat reng hian hmanhmawh bak léngin a rawn tlän lût. An thäwm chauh kan hre pha—ri rum rum chiah chu!

Vawiin … ka pian cham maw!? 

Daktawr chu a rawn chhuak leh miah lo! Zíng khua a vár dáwn hnai ta hial mai. Naute chu an la rawn chhuahpui leh miah lo! A hnu deuhah daktawr chuan min rawn ko. ‘I fapa chu rawn thutpui ve la,’ min ti.

Ka fapa, kháwl ringa thaw hrâwk hrâwk chu ka va thutpui ve a nih chu! Keini chuan thaw lâkna boruak pangngai hi kan khamkhawp mai a, kan duhtâwk mai a ni a. Mahse, ani ka fapa, ka neihchhun chuan kháwl a mamawh tel bîk tlat! Vawi khat thaw ka lâk chhúng hian ani chuan vawi thum vêl a la hman! A kiangah chuan ka thu reng a. Ka khawvêl—amah chu ka thlír reng mai. Beisei erawh a chau hle mai si a!

Intih harh tumin páwnah ka va chhuak. Ka harh lo a ni lo; boruak pangngai va hìp ka tum zawk a ni. Zíng ni rawn chhuak tùr chu káwlah a rawn inphan diar diar a; a máwi hle mai. Chutih rual chuan ka fapa chu ka ngaihtuah reng a. Engtia rei nge min dampui ang le…? Dárkár khat dang? Ka hre lo! A nih leh, darkár chanve dang tal? Ka hre lo tak zet!

Chutih lai tak mai chuan ka chhuahsan tâk pindan atang chuan thäwm ka hre thut! |ap thäwm a ni ka hriat chu! Ka tlàn lût a. Min duhsaka min hmangaihtu, daktawr, nurse te leh ka pizawnte chuan insùm kàrna tel miah loin, kan fapa, Bawiha chu bawhin an lo tap hawm hawm a nih chu! Kei erawh, ka tap thei lo!

Chutih lai chuan káwlah, mawi êm êmin ní a lo chhuak ve mék thung a. Vawiin atána ni lo chhuak mék chu … ka pian cham … maw!? Ka va duh lo êm! Kan beisei ang a va ni si lo êm!

Kan rèl leh ruat a ni lo!

Kan chunga thil lo thleng hi, “tùr a ni” emaw, “…a thleng ve tùr rëng aläwm,” emaw ti thei kan lo ni lo tak zet mai. Kan chungah hian, keini tehlul hian thu kan nei lul lo! Kan rèl leh ruat a ni lo—kan nuna thil thleng hi! Kan duan leh phuah pawh a ni hek lo—kan thawnthu hi!

C Lalzarmawia hla angin, “Hring mi nuna thleng thìn hi, / Kan rèl leh ruat a ni lo; / Jakoba Pathian ngei chu, / Ro min rèlsaktu a ni.? Kan Puithiam Krista zárah, / Amah chu kan Pa a ni; / Hmangaih tàwp loa hmangaihtu chu,” tih hi, kan hla sak tùr a lo ni zâwk e.

“Kan fapa, vàna mi …

“I nu leh i naute pahnih nèn, pian cham chibai aw…”