Bank a 2000 note thleng awm nual tawh
Tualchhung
Jun 05, 2023
ad
Aizawl: Reserve Bank of India (RBI) in May ni 19,2023 a Rs 2,000 note te hnuhkir a tum thu a puan atang leh 2000 note hi Bank lamah thleng theih tia thuchhuah a siam atangin Mizoram Bank hrang hrangah pawh thleng an awm nual tawh a. Bank thenkhat in account lama an dah tir laiin thenkhat chuan note te zawkin an thleng sak mek.
 
India rama pawisa note lian ber Rs. 2000 note hi kum 2016 khan siam tan a ni a, kum 8 emaw hman anih hnuah tihtawp a ni dawn tan a. Mipui te tan September 30, 2023 thleng bank ah an dah lut emaw an thleng thei dawn a, hemi hnuah chuan thleng theih a ni tawh dawn lo a ni. Aizawl khawpuia bank hrang hrangah mipui ten cheng 2000 hi note te zawk hmanga an thleng bakah mi tam tak chuan an Account lamah an dah lut (deposit) bawk.
 
Zalen in a kawmna ah State Bank of India thawktu te chuan pawisa thleng hi an awm deuh reng niin an sawi a, "Pawisa thleng hi a chang chuan an tam deuh a, a chang chuan tlem chang a awm bawk a. Pawisa thlengtu te hi pawisa note te zawka pek an awm bakah account lama dah lut te pawh an awm bawk a ni," an ti. Rs. 2000 note tihtawp chhan nia an hriat dan sawiin, "Rs. 500 note hi a tam avangin 2000 note hi a awm tulna vak a awm tawh lo a. Chubakah pawisa lem a lo awm palhin sawrkar tan channa anih theih bakah 2000 note hi lo chhe palh ta se mirethei tan chhiatna a ni thei bawk a ni," an ti bawk.
 
Mizorama branch ngah ber Mizoram Rural Bank thawktu te chuan an bank a 2000 thleng an awm zeuh zeuh tih an sawi a. pawisa thlengtu te chu a then pawisa note te zawka pek let an awm laiin account lama thusak te pawh an nei tih Zalen an hrilh a. Mizoram Cooperative Apex Bank chuan pawisa note te zawka thleng lovin account lamah an thun (deposit) thin niin an sawi bawk.
 
Rs. 2000 note thleng tur hian Aadhaar card emaw, voters ID emaw pan card neih/ken a ngai.

Latest News & Chhiar Hlawh