ZALEN : Mizoram khaw chhak lam, Samthang khua hi zikhlum thatna hmun a ni a, chhungkaw tam tak chu zikhlum chingin ei an zawng a. Aizawl leh hmun dangah an thlai tharte hralhin sum lak luhna tha takah an hmang thin a; mahse, kuminah erawh a hralhna lamah harsatna an tawh avangin zikhlum tawih hi a tam tawh hle.

Samthang khuaah hian zikhlum (off-season cabbage) chin niin kum 27 chhung vel chu eizawnna atan chhungkaw tam takin an lo hmang tawh a. Kuminah erawh phai atanga zikhlum lut a tam avangin a hralhna lamah harsatna an tawk zual ta niin an sawi.

Samthang khuaa zikhlum chingtu pakhat chuan, “Kum dangah pawh a hralhna lamah hian harsatna tawk tho mah ila kumin ang em em chuan kan la harsa ngai lo a. Dan ni chiah lo mah se kan ram chhunga zikhlum thartuten kan hralh that zawk nan kum dangah chuan sawrkar hi phai atanga zikhlum lut dang turin kan ti a, kuminah erawh min dansak theih loh vangin kan talbuai ta a ni ber e,” tiin ZALEN a hrilh.

YMA hmalaknain Aizawl veng hrang hrangah Samthang zikhlum chu zawrh chhuah a ni tih sawi bawkin, “Aizawl veng hrang hranga kan ngam tlak deuh YMA branch-te chu min zawrhsak turin kan ngen a, branch tam takin min zawrhsak vang hian kan lawm hle a. Hei mai bakah bialtu MLA-in a phurhna tur eng emaw zat min tumsak bawk a. Branch YMA kan zawrhtirah hian rate bituk kan nei lo a, an remchan ang angin a rate hi an lo bithliah mai a ni,” tiin zikhlum chingtu pakhat chuan a sawi.

Thudawn danin Samthang khua hian kumin hian chhungkaw 145-in zikhlum bul nuai 15 vel an ching a, a lo berah pawh quintal 50,000 chuang thar turin an beisei a. Hetih lai hian an hralh theih loh vanga tawih hi quintal 4,000 vel zet chu awm tawh tura ngaih a ni thung. 

Samthang branch YMA ngenna angin Aizawl City branch YMA thenkhat - Bethlehem Vengthlang, Mission Veng, Luangmual, Tuikual North, Bethlehem, Republic, Zonuam, ITI leh Chaltlang Branch YMA te chuan zikhlum hi an zawrhsak a. A zawrhsaktu zinga mi, Republic branch YMA President L.Ramdinliana Renthlei chuan Samthang Farmers Association-in an branch YMA-ah ziakin an harsatna an thlen a, branch committee chuan an harsatna hriain lo zawrhsak nise a tih vanga zuar an ni tih ZALEN a hrilh.

An zawrhsak dan sawiin, “Kan veng kawn remchangah kan pho chhuahsak a, veng chhung information-ah kan au a, group hrang hrangah kan post bawk a, section hrang hrangah kan sem darh bawk. Zikhlum hi kg-ah Rs. 30-in kan zuar a, YMA chuan hlawkna kan nei lem lo a, YMA takin kan lo zawrhsak mai a ni,” a ti.

ZALEN-in a biak pa pakhat chuan, “Phai lam nen tehkhin chuan Mizote hi sumdawnna kawngah kan la hniam em avangin leh phai lam sumdawngte kan la el phak loh em avangin sawrkar hi kan innghahna a ni lo thei lo a; chuvangin, kuthnathawktute tan hian tun ai hian tan la leh thei deuh se ka duh hle. Chubakah zikhlum a ni emaw, thlai dang emaw pawh nise, phai lam hi chu damdawi hmanga chawm seilente an ni duh hle a, Mizoram chhunga mi hi chu a nih ve loh avangin tlemin to deuh pawh nise mipuite hian lei nachang hria ila tha hlein ka hria,” tiin ZALEN a hrilh bawk.