Aizawl May 21, 2023 : Mizorama kohhran hrang hrangte inzawmkhawmna tur, Council of Churches in Mizoram ruangam leh kalphung tur chu pawm a ni a, mahni kohhran inkhawmpuiah theuh ngaihtuah leh hnuah la thutkhawm leh nise an ti.

Kohhran inzawmkhawm tura hma latu, Council of Churches in Mizoram chuan Zirtawpni kalta khan joint committee meeting vawi hnihna chu Booth Mansion Hall, Salvation Army Territorial Headquarters-ah an nei a. Joint committee meeting-ah hian kohhran hrang hrang atangin palai 45 an kal khawm a, Synod Moderator Rev. Dr. Chawnghmingliana chu chairman niin a kaihruai a ni. BCM General Secretary Rev. R. Lalbiakliana chuan report a pe a. Meeting hmasaa minute te, kohhran hrang hrangte sawm an nih thu te, March 28, 2023-a BCM Headquarters Office, Serkawn Lunglei-ah drafting committee an thutkhawm thu te a report a ni.

Meeting-ah hian drafting committee-in Council of Churches in Mizoram ruangam leh kalphung tur a lo duan lawk chu an thlirho va, siam that ngai laite siam that a nih hnuah mahni kohhran rorelna sang berah put luh theih ni se tiin an tin a ni. 

ZALEN-in meeting-a tel te hnen atanga thu a dawn danin a thuphungin ruahmanna hi an pawm a; mahse, thutlukna siam theitu an nih loh avangin mahni kohhran theuh inkhawmpui lianah sawi leh nise. Inkhawmpui lian a sawiho hnuah nakum March thla velah meeting neih leh tum nise an ti.

Thudawn danin kohhran hrang hrang aiawh kalkhawmin an remtih tawh a nih avangin inkhawmpui lianah hian a tlang ngei beisei a ni.

January 24, 2023 khan kohhran panga - Presbyterian, Baptist, Evangelical Church of Maraland (ECM), Lairam Isua Krista Baptist Kohhran (LIKBK) leh Salvation Army te kalkhawm chuan ‘Council of Churches in Mizoram’ din hi an lo rel tawh a. March 28 khan BCM Meeting Hall, BCM Office, Lunglei-ah a ruangam tur duangtu, drafting committee an thukhawm a, church council ruangam (structure) hi an duang fel a ni.

Council of Churches in Mizoram ruangam duangtu-ah hian Rev. Lalnunzira, Baptist Church of Mizoram chu convener niin Rev. Dr. Lalhmangaiha, Presbyterian Church of India-in a pui bawk a. Anni bakah hian Presbyterian Kohhran, Baptist Kohhran, ECM, LIKBK leh Salvation Army atangin aiawh an tel bawk a ni.

Zirtawpnia Council of Churches in Mizoram sawihonaah hian IKK Bualpui (Ng) bakah EFCI aiawhte an tel belh a, kohhran dang erawh sawm an ni chungin an tel lo thung.