ZALEN June 20, 2025: 233rd Indian Road Congress Mid Term Council hawnna inkhawm chu vawiin khan MZU Auditorium-ah buatsaih a ni a. Chief Minister Lalduhoma chu khuallian niin he council hi a hawng a, Union Minister of State for MoRTH & Corporate Affairs Harsh Malhotra chu khualzahawm a ni.

Chief Minister chuan, "Mizoram chuan Airport pakhat leh Rel kawng pakhat chauh a la neih avangin kawngpui hi kan nitin chak lakna hnar, kan innghahna a ni a. Chutihlaiin kan road density chu kilometre za bialah kilometer 46.37 chauh a la ni (46.37 kms per 100sqkm), India ram kawngpui density chawhrual (national avarage) chu 116kms per 100sqkms a ni thung a. Kan dinhmun a la hniam hle. Kawngpui kan mamawh belhna a la sanzia chu khawtin atang hian an lo leh huan panna kawngpui laihsak dilna hi a lo lut chur chur reng mai a. Thingtlang khaw mawngping kan tih ang chi, an khaw thenawmte nena inkalpawhna la mamawh pawh kan ngah hle," a ti.

Mizoram chu fur ruahtui dawng tam ram a nih avangin National Highway te chu rigid pavement in siam thei zawk ila, a siamna man a lo sang deuh a nih pawhin a enkawl zuina man a tlem ve thung a, a tlo em em a. Sum leh pai senso hi khuareiah a tlem zawk ang. Tin, international ramri thui tak nei kan nih avangin kan National Highway te hi strategic road ah puang ila, chak zawkin hna kan thawk thei ang a, kan ram tan a tangkai zawkin ka ring, tiin Mizorama National Highway enkawl dan tha zawk nia a ngaih a tarlang.

Mizorama National Highway sial hnathawktuten leivung paihna (spoil banks) an hman that tawk loh thu leh environment leh loneituten an tawrh nasat thu sawiin, tun hnuah chuan tha taka kalpui zel tawh turin a chah a. Kawngpui siam thar ni si, chhe hma leh lutuk, fur khat pawh daih lo va siam a ni thin chu tihbo a duh thu te, kawng kual a la tam lutuk chu a ngaimawh thu leh hmun tam tak chu sum sen belh lutuk lo va ngil taka sial theih nia a ngaih thu te, kawngpuiin kawrte a kanin kawrtea hume pipe dah thlak a, a chung chu leia hnawh khah a, kawngkamah hmuhma thar tha tak tak siam belh zel mai thaa a hriat thu te, hnathawktuten khaw kar kawng aiin khaw chhung kawng khawih hmasa zel se, mipuiten hmasawnna lo chhawr hma zel se a tha a tih thu te a tarlang a. Tun sawrkar kum kal mekah Central Road Fund hi Rs. 300 Cr tal centralin Mizoram pe thei se a duh thu a sawi bawk.

Chief Minister hian member kal khawm te chungah lawmthu sawiin, council hlawhtling tak nei turin duhsakna a hlan a ni. 

Harsh Malhotra pawhin thusawiin, "Mizoram chu ram mawi tak a ni a, mipuite pawh hmuh an nuam a, sawrkarin min lo dawnsawn danah pawh ka lawm hle. Kawngpui tha neih hi kan ram ei leh bar hmasawnna nen a inzawm tlat a. Central sawrkar hian a ngaipawimawh a, hma a la nasain hmachhawp pawh a ngah hle. Thingtlang lamah pawh hmalakna hi kan zauh zel dawn a ni. Kawngpui tha leh tlo kan neih theih nan Indian Roads Congress hian mawhphurhna pawimawh tak a chelh a, khawvel ram dangte el phak a kan quality kan tihsan a, kan leilung, sik leh sa leh ram awm dan azir zel a hmanrua leh design tha kan ngaihtuah chhuah zel a ngai a ni, a ti a. Mizorama National Highway te rigid pavement ni tawh se tia Chief Minister-in a ngenna hi kan hria a, tihhlawhtlin ngei kan tum dawn a ni," a ti. Prime Minister Narendra Modi kaihhruai sawrkarin India hmarchhak state te tana hma a lakna langsar te a tarlang bawk.