Aizawl : MNF Tuivawl North Block chuan Ningani-a MPCC Media Department ten Press Release an siama Sakawrdai, Zokhawthiang, Vaitin, North Khawdungsei leh Tinghmun khua atanga SEDP dawngtute pawisa MNF-in a chhuh sak anga an sawi chu dâwt hmanga mipui rilru hruai kâwi tumah an puh. "Lalsawta kaihhruai Congress party-ah thil thar hmuh tur a awm lo; an ze ngai chhuahin mipui bum nan dawtsawi an la ching chhunzawn zel," an ti.

MNF, Tuivawl North Block chuan, Sakawrdai-a SEDP dawngtute pawisa chhuhsak emaw, cut sak tumna emaw a awm loa, pe tûra tihna pawh a awm lo. SEDP dawngtu zînga mi thenkhatte'n lâwmthu sawi nan ₹500/- te,  ₹200/- te, a thenin ₹ 100/- ten an pe zâwk a ni. Party leh Village Level SEDP Committee te'n engmah an chhuhsak lova, an cut sak bawk hek lo. A ṭhenin an pe a, a ṭhenin an pe lo bawk. MPCC Press release-a ₹500/- zêl chhuhsak anga an sawi hi thu belhchian dâwlloh a ni, an ti.

Zokhawthiang atanga SEDP Launching Programme-a tel tûr te chuan kal leh haw lam senso atân SEDP dawngtu tûrten mimal pawisa an lo pûk a, SEDP pawisa an dawn veleh an pawisa pûk rulh nan theih ang an pekhâwm mai a ni, an ti bawk.

Vaitin-a SEDP dawngtute pawisa chhuhsak an ni lo, an ti a, cut sak an ni loh thu an tarlang. "SEDP pawisa dawngtu zînga mi thenkhatin lâwmthu sawi nan an thuin an pe zawk a ni. Party fund atâna chhuhsak emaw, cut sak engmah a awm lo," an ti.

North Khawdungsei Village Level SEDP Committee te kal vêlna senso phuhhrukna atân SEDP dawngtuten mimal thahnemngaihnain an theih ang zât an pe a, pawisa chhuhsak emaw, tukluihna engmah a awm lo, an ti bawk.

MNF, Tuivawl North Block chuan, Tinghmun bikah Village Level SEDP Committee ten buaipui ngai zawng zawng an buaipui a, paper work leh kal vêlna senso atân anmahni ṭhahnemngaihnain ₹100/- in an thawhkhâwm a. SEDP dawngtute ₹1050/- zêl chhuhsak anga MPCC ten an sawi hi thudiklo a ni, an ti.  
    Mauchar-ah SEDP dawngtuten an pawisa dawn la chhuak tûrin Mauchar aṭanga Sakawrdai inkâr motor an hire a, motor hman man atân ₹100/- den denin an thawhkhâwm. Pawisa chhuhsak anga MPCC ten an sawi hi thu belhchian dâwl lo a ni, an ti bawk.

MNF chuan, SEDP dawngtute pawisa duh zât zât chhuhsak anga MPCC-in MNF party an puhna hi dâwt a ni a, hei hian MPCC-in mipui te dâwt hmanga bum kual theih anga an ngaih zia a tilang chiang hle a; kum tamtak sawrkarna fawng lo vuan tawh Mizoram Pradesh Congress Committee hian Mizoram mipuite engah mah a ngaih loh zia a tichiang, tiin. Thu belhchian dawl lo hmanga mipui rilru hruaikawi an tum thina puhin, bânsan turin an ngên tih an tarlang bawk.