Aizawl May 20, 2023 : Vawiin khan Aizawl khawpui chhunga Iron Rod, Cement leh Balu dawr, dan lova Hnam dang te thurualpuia siam nia hriatte chu Central YMA hruaituten an dawrah kal chilhin, khar turin an ngen a, dawr engemaw zat khar a ni. Central YMA President R. Lalngheta chuan hemi kawnga an hmalakna kal zel dan tur chu Committee in a la rel zel ang a ti.

Central YMA hian an Kumpuan "Ram leh Hnam Humhalh" kawnga an hmalakna kawng khat atan, Mizo hming hawha Hnam dang ten Irod & Cement dawr an hawn te, Mizo ten Hnam dang thurualpuia hetiang lama sumdawng kalpui te chu hun engemaw chen an zirchian hnuah list an siam chhuak a. ALL Mizoram Cement & Iron Rod Dealers Association (AMCIRDA) te zirchianna nena enkawp chungin, rinhelh kai dawr 91-te chu vawiin khan Central YMA-in hnatlang kovin, thuang (Team) 5 a insem darhin hmalakna hi kalpui a ni.

Central YMA President R. Lalngheta chuan hemi kawnga an hmalakna kal zel dan tur chu Committee in a la rel zel ang a ti a. Thlak khat chhunga lo inching fel tura an ngenna ngaipawimawha an dawr khar tawh te, an Hnam dang kawpte lo ti tawp mi engemawzat te chungah Central YMA hminga lawmthu sawiin Mizorama sumdawnna hi a ram leilung fate ngeiin an kalpui a, Hnam dang kuta sumdawnna sum leh pai a luang lut nasa lutuk chu hnam tan a him lova, Mizo mipuite tan rual a tul tak zet zet a ni a ti. 

Iron Rod leh Cement hmanga sumdawnna pawh hi Mizo te kutah ngei a hlawkna tam ber a luan luh hi an duh thu CYMA President chuan a sawi a, "Hnamdang dan lova lo sumdawn puite pawh anmahni kut ngeia an sumdawnna a awm theih nan hma kan la zel dâwn a ni, a ti. Central YMA President chuan an hmalakna kawngah hian Mizo mipui zawng zawngte thlawpna leh tawiawmna a ngen bawk a ni.

Central YMA te hian an list-a awm dawr neitute leh an dawr awmna area Branch YMA hruaitu theuh te chu Ni 10, April 2023 khan Central YMA Hall Tuikhuahtlangah ko khawmin, ngenna an lo siam tawh a. Hemi ni atanga thla 1 chhunga an Hnam dang tgurualpuite nen lo in ching fel turin hun an lo pe tawh a. Hetia an hun tiam chhung thla 1 ral hnu May Ni 12, 2023 khan dawr awmna area Br. YMA hruaitute in rawnkhawm leh a nih hnuah vawiina hnatlang koh hi an rel ta a ni. 

Vawiin hnatlangah hian Central YMA hruaitu CEC te leh Kumpuan Sub Committee member-te thawk chhuakin, dawr awmna Branch YMA hruaituten an mahni veng theuhah an lo tawiawm bawk a ni.