January 31, 2024; Aizawl Traffic Police chuan thuchhuah siamin, dan in a khap angin, double overtaking ti lo turin lirthei khalhtute an ngen.

Lirthei khalhtu, a bikin motorcycle/scooter khalhtu thenkhat ten double overtaking kan ching fo tih an thuchhuah ah chuan tarlangin, hei hian a opposite side atanga lirthei lo kal tur kalna kawng a hnawh thin avangin traffic jam a thlen thin tih an tarlang.

"The Motor Vehicle (Driving Regulations, 2017) in double overtaking hi a khap a, accident tawh palh theihna a nih avang te leh driving manners hriat loh vang te a nih avangin double overtaking hi ti lo turin Lirthei khalhtute kan inngen thar leh a ni," tiin an tarlang bawk.

Lane driving discipline tha tak Aizawl khawpui a kan neih hi rampum ang pawh a Mizoram kan thangthatna a nih thu te tarlang bawkin, Traffic Police leh lirthei khalhtu zawng zawngte tanrualna avang a nih angin vawng nung zel turin lirthei khalhtute an chah.