Lunglei : Nimin khan Mizoram Journalists Association Lunglei District chuan Annual Conference 2022 chu Lunglei Press Clubah hmangin C Lalrinsanga Minister Agriculture leh Zonunsanga Khiangte President MJA General Headquarter te'n an hmanpui.

Khuallian C Lalrinsanga, Agriculture Minister chuan hripui leng vanga print media in hlawkna a nei ta lo lai chuan rilru a ti kalthui thin thu sawiin, "Heti chunga chanchinbumite nghet taka hnaa in in vit bur tlat thin hi a ropui ka ti a. Awn lam nei thiang in ni loa, nghet taka kal a ngai a, chumi a pelhsawlh rual chuan MJA pawh a kalsual a ni ang," tiin a sawi a ni. 

MJA General Headquarters President Zonunsanga Khiangte chuan, " Journalism chu rawngbawlna a ni a, sum leh pai tuihal huam huam tana thawh chi a ni loa, chutiang beisei neia lo lut te chu an chhuak leh vat mai thin a, kan tawrh pawh hi a chhel a ni," tiin a sawi a ni. MJA President chuan Journalist pension chu MJA golden jubilee present atan sawrkarin a tihhlawhtlin ngei an beisei tih a sawi bawk. 

MJA Lunglei District President H. Lalthansanga chuan tunlaiin social media chu sum lakluhna a nih tak avangin thil him thliar loa tihchhuah a tam ta a, hemi tak hian keini ethics vuan tlattute hlutna tarlangtu a ni," a ti bawk.

MJA Lunglei hian hruaitu an thlang nghal a, chungte chu :
President  : Laltlanthanga
Vice  : Thanghmingliana
Treasurer: V. Rokhawlkima