ZALEN August 17, 2025: Mizorama mihring chuktu tam ber chu rultuha a ni a. A chukah hian damdawi inten antivenom an hmang thin a, hei hian awmzia a neih loh bakah allergy nei tan thihna hial a thlen thei nia thudawn a ni.

ZALEN-in Mizoram University-a nungcha leh rul chanchin zirtu, Department of Zoology-a thawk Prof. HT Lalremsanga hnen atanga thu a dawn danin Mizorama rul mihring chuktu tam ber chu rultuha a ni a, hetih lai hian rulchuk vanga thi tamna ber chu black krait niin a dawtah chawnglei leh chawngkawr chukte a ni tih a sawi.

Tunlai fur lai hi rul chhuah duh hun a ni tih sawiin, “Thal zawha ruahtui a rawn tlak hian thlaite an rawn chawrno a, chu chuan chaw-a thlai ringtu rannung (insects) a rawn tipuang a, rannungho eitu uchang/utawk, laiking leh a dangte an rawn chhuak ve leh a. Hengho ei tur hian rul an rawn chhuak ve leh thin a. Hei bakah hian taksa a lumna nei lo (cold blooded/poikilotherm) an nih avangin khawlum hian an bihrukna atangin a rawn kai tho bawk a ni,” a ti. 

Mizorama rulchuk damdawi kan neih antivenom chu a hmantlak loh tih sawiin, "Mizorama kan antivenom neih hi India ram pumhuap a ni a, rul lian pali (Spectacled cobra, Common krait, Russell viper leh Saw Scaled viper) ho tur chawhpawlh atanga siam a ni a. Hmarchhak biala common ve lo tur atang a siam a ni a, India hmarchhaka rul hlauhawm (deadly venomous snakes) ho tur thah nan a chak tawk loh mai bakah rultuha ho tur ah phei chuan awmze nei lo (zero) ang chauh a ni a, a hmantlak lo a ni," a ti a. "Hetiang antivenom hi huat (allergy) nei tan chuan thihna hial te a thlen theih bakah complications hrang hrang a awm thei a. Damdawi in lam pawh hmang tawh lo turin vawi tam kan hrilh thin a, hre zawk inti in an zawm duh lo a ni," a ti bawk.

Rul chuk enkawl dan sawi bawkin Prof. HTA chuan, "India ramah hian rul tur nei chuk, vawi leh khata mihring nunna la thei chi pakhat mah an awm lo a. Damdawi awm lo pawh ni se, ramhnuaiah rul tur hlauhawm neiin mihring a chuk chuan a chukna taksa bawr kha tih chet loh hram (immobilised) tur a ni a, them (thing tang/phek) nen a puanthem a tawt (tight) si loa tawn tur a ni a. A theih chuan zawn emaw kaihkuah a khawlam panpui hram hram tur niin tawng thlamuan char char a pawimawh a ni," a ti a. "Hlauthawng a awm, zu intir leh mizopa damdawi tam zawk te hi chuan thisen kal a ti chak a, rul tur hnathawh kha a tichak zual ta thin a, chuvangin a hlauhawm zual a ni. Duhthusamah chuan golden chance/minute (minute 100) chhung a medical facilities thlenpui hman chuan enkawl dam a awlsam zual a. Hemi hnu lamah pawh damdawi nen a chhan ala harsa lem lo a ni," a ti bawk.   

Tun hnaia Mizoram a rûltuha túr (venom) mithiam ten an zirchianna ah chuan proteins/peptides chi hrang hrang 53 lai awmin chung zinga 10 te chu rul tur (snake venom protein) an ni a. 

A tam ber chu Phospholipase A2 leh Serine protease te niin enzyme (bâwlhlo in siam danglamna puibawmtu) ni lo ah chuan Snaclec a tam ber thung. Heng protein te hi thisen khang tur tibuaitu niin, túr dang, snake venom metalloproteases, L-amino acid oxidases, disintegrins leh cysteine-rich secretory protein te hi rûltuha chuk a tihrawl eichhetu, durh, vûng leh nâ thlentu an ni tih hmuhchhuah niin protein dang C-type lectins, C-type natriuretic peptides leh glutamyl-peptide cyclotransferases an awm bawk a ni. 

Heng tûr te hian thisen a timûr (cell) thenkhat platelets, taksa a pem alo awm a thisen chhuak reng tur vengtu te hnathawh an tibuai thin tih hmuhchhuah a ni bawk.