Aizawl October 24, 2022 : Mizoram Pradesh Congress Committee Media Department chuan vawiin khan MPCC President Lalsawta'n Aizawl East II bial a enkawl laia a hnathawh te an tlawh a, Aizawl East-II huam chhung veng te tana rotling (asset) te chu Lalsawta hnathawh a ni tih a takin kan hmu, an ti.

Lalsawta hian Aizawl East-II a bial chhungin MLA fund piah lamah, veng hrang hrang hall leh Auditorium te, in kal pawhna kawng leh Lei te bakah mipuiin an hman tangkai Aizawl Bazar puite sak that a nih theih nan hmalakna thui tak a nei hman a, NEDP sum atangin cheng nuai 3641.59 lai ruahmanin bul a tan, an ti. "Kum 4 a ral hnuah pawh MNF sorkar hnuaiah a hlawhtlinna hmel hmuh tur a la awm mumal lo. Pu Lalsawta hun laia sak New Market Building tharah tawt takin thilzuartute an inhnawh mek a ni a, hei hi Congress Party chuan pawi a ti tak zet a ni," an ti

MPCC Media chuan, "Lalsawta hian Aizawl East-II a bial chhung hian bial chhung a hna tha tak tak a thawh piah lamah, Mizoramin sum dinhmun tha kan neih theih nan, sum leh pai insawhngheh kum (Year of Consolidation) te, Inrenchemna (Austerity measure) nasa taka a kal pui avangin mi tam takin Finance Minister tha ber a ni an ti hial. Tuna kan sawrkarin heng kum 3 chhung emaw lek a Ways & Means Advance leh Special Drawing Facility hmang a vawi 184 lai RBI atanga sum an puk tawh hi kum 2016 leh 2018 inkarah phei chuan vawikhat mah puk ngai tawh loin Mizoram sum dinhmun a lo siam tha hial tawh a ni. Chutiang taka hnathawk tha Congress Party-in President atana kan nei hi a lawmawm kan ti hle bawk," an ti bawk.

MPCC Media Department hian Aizawl East-II bial an tlawh pah hian bialtu MLA leh Sports Minister ni bawk Robert Romawia Royte hnathawh a tum na, lungphum a phum tawh thenkhatte an en a. MLA inthlan dawna a intiamna te chu a ti hlawhtling tha lo hle, niin an thuchhuah-ah an tarlang a, bial chhung inkalpawhna thenkhat phei chu MLA a nih hnua khawih danglam la ni miah lo ang mai a zawh tlak loh hial te pawh a awm, niin an sawi. 

Congress hian MNF Ministry chu an kalna apiang a awlsam taka lung phum mai thei, a tak tak a hnathawh hmuh tur awm leh si lovah an puh a. An hnathawh tura an sawi tam tak chu Romei zam, kal hnaiha bo leh thin ang mai a beisei bo, an ti. "Pathian leh Mizoram mipuite zarah Congress Party-in sawrkarna kan siam leh a nih chuan Tuirial Hydel Project leh Falkawn Referral Hospital kan lo tih hlawhtlin tawh ang bawkin MNF sorkarin lung a phum ve ringawt, tih hlawhtlin ngaihna an hriat loh te hi tihhlawhtlin leh vek kan tum a ni," an ti.