Aizawl: Mizoram State Health Care Scheme (MSHCS) hnuaiah kum hmasa lam aiin kum 2022-23 atana inziak lut  an tlahniam a, chhungkua 39,505 inziak lut awmin nikum aia a tlemna zaa 45.04 a tling. Hetihlai hian July 27, 2022 thlenga Mizoram sawrkarin health care bill ba a neih zat chu Rs. 74,71,58,170 a tling.

Health department-in RTI zawhna a chhan danin kum kal mek, 2022-23 chhung atana health care scheme-a inziak lut chhungkaw 39,505-te atanga enrollment fee hmuh dan chu AAY (card eng) atangin Rs. 9,32,760, PHH (card pawl) atangin Rs. 1,88,26,780, Non - NFSA (card var) atangin Rs. 2,94,98,040 leh ration card nei lote atangin Rs. 4,23,720, a vaiin Rs. 4,96,81,300 a ni.

Health care-a inziah luhna man hi AAY (card var) tan Rs. 200, PHH (card pawl) tan Rs. 1,000, Non-NFSA (card var) tan Rs. 2,000 leh ration card nei lo tan Rs. 2,000 niin, chhungkaw member zat bituk a awm lo.

MHCS-ah (policy year) October 1, 2019-September 30, 2020 (thla 12)-ah inziak lut chhungkaw 61,015 an awm a. October 1, 2020-September 30, 2021 (thla 12)-ah chhungkaw 1,13,720, October 1, 2021 - March 31, 2022 (thla ruk)-ah chhungkaw 87,695 inziak lut an lo awm tawh a, kumin hi tun hnai  kum li (policy year) chhunga inziak lut tlem ber kum a ni.

Hemi thu-ah hian health department chuan health care scheme-a inziah luh chu mi mal duhthlanna (voluntary) a nih thu leh kumina inziak lut tlemna chhan hre turin zirchianna neih a nih loh thu RTI chhannaah chuan an tar lang.

July 27, 2022 thleng khan Mizoram sawrkarin health care bill ba Rs. 74,71,58,170  a nei a, chungte chu policy year October 1, 2020 - September 30, 2021-a mi 9,530-te bill Rs. 25,32,23,950; October 1, 2021 - March 31, 2022-a mi 12,680-te bill Rs. 33,32,15,494 leh kum kal mek, April 1, 2022 - March 31, 2023-a mi 5,214-te bill Rs. 16,07,18,726 a ni.

MR bill thei lo zawng zawngten health care hamthatna an hmang tangkai thei a, damdawi ina an inenkawlna senso atan chhungkaw pakhatin scheme policy khat atan Rs. 2,00,000 thleng an hmang thei.

MSHCS-a inziak lut : 2022-23

District           Chhungkua
Aizawl            27,532
Kolasib           2,201
Mamit            1,401
Champhai      2,498
Serchhip         1,725
Lunglei           2,923
Lawngtlai       700
Siaha              525
TOTAL            39,505