ZALEN May 1, 2025: Vawiin chhuna ruah tam tak a sur hnu, tlai dar 3:15 vel khan Ngaizel phei, Lalnghakliana Filling Station, Aizawla petrol pump bulah lung tlain taxi tlan lai a delh a, thi leh hliam an awm lo.

ZALEN thudawn danin Lalnghakliana Filling Station bula lung tlain a delh taxi-ah hian a khalhtu leh mi dang pathum an chuang a, motor hi tlem chhiain lung tlate hi a bula dawr nghak leh mi tlawmngaiten thian faiin motor kal theihin tihtlang leh nghal a ni.

Ngaizel pheiah hian April 10 tlaiah pawh khan lung tlain Tachhip atanga Aizawl pan scooter-a inphur a lo delh tawh a, a khalhtu thiin a mi phurh hian hliam na tak a lo tuar tawh bawk.

Ruah sur avanga Ngaizel pheiah lung tla a awm leh thin avanga leh vawiinah pawh lung tlain harsatna a thlen avangin Aizawl DC chuan mipuite him zawk nan DM Act, 2005 Section 34 (b) (c)-in a thuneihna a pek angin May 1, 2025 (Ningani) zan dar 7:00 pm atangin Ngaizel kawngah lirthei eng chi mah tlan phal a ni lo. Kea kala kawng hmangtute pawh fimkhur turin a hriattir.

Aizawl DC chuan lung tlak mai hlauhawm hi naktuk hian Aizawl District Disaster Management Authority leh PWD te'n thenfai hna an thawk dawn a, hemi hunah hian Traffic, Aizawlin lirthei tlan dan tur ruahmanna an siam ngai pawimawha zawm turin hriattirna hi a chhuah.