June 4, 2023; Tun ni thum chhungin suahsualna kawng hrang hrang tihremna turin police, VDP leh tlawmngai pawl ten hma an la a, ganja hmun te sam a ni a, ruihhlo zuar leh rukru te man an ni bawk.

Nimin khan Champhai Police leh Village Defence Party (VDP), Khuangleng, Champhai District tangkawp chuan Khuangleng khaw ram chhung leh chhehvela Ganja (Cannabis) tualto, Kg 200 chuang chu a zung chawpa pawt phawng vekin an hal ral a ni.

Nimin piah (2.6.2023) khan Champhai Police Chalbawiha Junction Khankawn Police Check Gate duty-te chuan Lalrinnunga (27) s/o Lalthlengliana, Hmuncheng, Khawzawl District (P/A Bethel Vengthar, Champhai) nia inchhal kut atangin heroin gram 114 (hawng 9), international market-a nuai 57 man hu leh gram 38 (hawng 3) dang, international market-a nuai 19 man hu Andy Lalrinawma (48) s/o Liantuala Sailo(L), Tuikhuahtlang, Aizawl nia inchhal kut atangin an man. An pahnih hian Champhai atang Aizawl pan lirthei pakhat (Wagon R -  No WB 02 Z 5058) a chuang ho an ni. Champhai PS-ah thubuai, ND&PS Act hnuaiah chhuizui tura ziahluh a ni.

Bike ruk pakhat, mi tlawmngaite puihna zarah hmuhlet a ni. June ni 1 zan khan Samlukhai khuaa In pakhat bula hunlai bike chu ruk a ni a. Falkawn khawtlang tlawmngaite puihnain he thila inhnamhnawih Lalnunpuia (23) s/o Saikhuma, Bawngthah, Mamit District (P/A - Falkawn) chu Sialsuk PS ten man in, a bike ruk pawh hmuhlet a ni. Falkawn khawtlang tlawmngai te puihna leh thlawpnaah lawmthu kan sawi tak meuh meuh a ni.