November 11, 2022; Rokunga Memorial Society (RMS) chuan vawiin chhun dar 12 khan Rokunga Award - 2021 dawng tur an puang a. Tun thla ni 28 ah Aijal Club ah award hlanna hun an hmang ang.

Vawiin khan RMS hruaitute chuan Aizawl Press Club ah thuthar thehdarhtute kawmin, Rokunga Award - 2021 dawng turin Malsawmkima (64) Saitual Venglai thlan a ni tih an puang a, award in Tangkapui, Citation leh pawisa fai Rs. 50,000 a keng tel dawn tih an sawi.

RMS hruaitute chuan Rokunga Award chu a vawi khatna atan kum 2018 ah R. Zaikunga, Lunglawn hnenah hlan a lo ni tawh tih an sawi a, kum 3 dan zel a hlan tura ruahmanna siam a nih laiin, nikum 2021 ah Covid vanga buaipui theih a nih tak loh avangin kumin ah buatsaih a ni tih an sawi.

Rokunga Award -2021 atan Jury turin mi 5 ruat an ni a, convener PC. Lawmkunga, IAS retd niin, member ah CS. Thangkhuma, Dr. K. Rokhawla, Dr. Rualkhuma Colney leh RMS atangin C. Vanlallawma te an ni. RMS chuan Cenral YMA ah dilna thlenin, YMA branch hrang hrangte chu award dawng tlak nia an hriatte thawh (nominate) turin an ngen a, rawtna lutte zirchian a nih hnuah, Jury te leh RMS ten award dawng tur an thlang thin.

RMS in Rokunga Award dawng tur thlanna tehfung an siam hrang hrang zingah, 'Tlawmngahna', 'Huaisenna,' 'Taimakna', 'Rinawmna' leh 'Dikna' te chu an ngaih pawimawh a ni.

• Rokunga Award - 2021 dawng tur : Malsawmkima chanchin thenkhat:
• 1. High School a kal lai, 1975-78 ah All Round Best Boy ah thlan a ni a, hemi thlang tura an tehfung chu - taima, tlawmngai, huaisen leh invawngfai tih te a ni.
• 2. Kum 1978 khan kum 20 a nih laiin, Saitual khuaa 'Tlawmngai ber' ah thlan a ni.
• 3. Kum 2013 ah Saitual YMA in Tlawmngaihna Nopui an hlan.
• 4. A tlawmngaih em avangin 16th Group YMA chuan Jt. Secretary post siamin an luahtir a, hei hi post awm lo, amah duhsak vanga an siam chawp a ni a, amah lo chu tumah Jt. Secretary dang an awm leh lo a ni.