March 29, 2022; Lalchangkima, Regional Manager, SBI Mizoram Region chuan Rs. 10/- thir (coin) chu hman theih reng a ni tih sawiin, a thih loh thu leh a lem pawh a nih loh thu a sawi a, hemi chungchangah hian awareness erawh tihthat a ngaih thu a sawi.

ZALEN zawhna chhanga he thu hi sawiin, Lalchangkima chuan, "Mipuiin kan duh lo ni a ngaih theihin a awm a, a thi lo a, a pangngai vek a ni. A lem pawh a ni lo, kan insawi thaih vang mai mai a ni." a ti.

Hemi chungchang hi RBI leh sawrkawr nen committee ah pawh an sawi tawh thin thu leh Bank lam leh RBI lam atang chuan hman theih a nih thu an sawi zin tawh thu sawiin, sawrkarin thuchhuah siamin, valid tender a nih vangin tute pawhin pawm tur a ni ti sela, chu chuan nghawng tha tak a neih a beiseiawm ber thu a sawi. "Bank leh RBI atang chuan kan ti zing tawh a, mipuiin an awih tak tak lo emaw tih mai tur nia ngaih theihin a awm," a ti bawk.

Rs. 10 thir chungchangah RBI a complaint an siam thin tawh thu sawi bawkin, Lalchangkima chuan, "A rit a, a lian bawk si a, RBI pawhin an tihsual an pawm a, mahse siamsa a awm teuh tawh si a, a bul atanga siam that leh ngawt theih a ni lo," tiin, cheng 20 coin an siam thar erawh a ziaawm thu leh RBI in Rs. 10 leh 20 note thar min pek a rinawm rih loh vangin, cheng 10 thir chu kan hman tho tho a ngaih hmel a, a coin chauh a awm rih (tualleng tam ber tur) dawn nia a lan thu pawh a sawi.