Aizawl; School Education department chuan Mizoram sawrkar hnuaia sikul zawng zawng ten Academic year 2023-2024 atanga an hman tan tur, uniform inang tlang (common school uniform) a duang fel tawh a, uniform supply chung-changah sawrkar/ department a in rawlh dawn lo.

ZALEN thudawn danin, School Education minister hova June ni 17, 2022 a meeting in a rel, Academic year 2023-24 atanga hman tan tur, common school uniform chungchang-ah, sikul tin te chu an uniform buaipui tur a tih an ni dawn a, uniform supply chungchangah sawrkar/department a inrawlh dawn lo.

Hemi bakah hian Samagra Shiksha hnuaia upper primary te chuan primary leh middle te tana common uniform thlan sa atangin an uniform rawng an thlang thei dawn a, thui dan thlan sa angin an thui thung ang. Comprehensive school te chu common uniform hman tur thlan sa atanga an duhzawng thlang turin sikul thuneihna ah dah a ni dawn a, Adhoc-aided school te pawhin common uniform hi an hmang ve bawk ang.

Media hrang hranga tarlan tawh angin, minister leh hotu dangte thukhawm chuan, Mizorama sawrkar sikul zawng zawngte tan uniform inang tlang neih a lo rel tawh a, chumi thuchhuak tihhlawhtlin dan tur chu ngaihtuahin May 20, 2022 khan School Education Director kaihhruaiin zirtirtu pawl hrang hrang aiawhte an thukhawm leh a, chuta rawtna an neihte chu pawmsak tur leh hma laksak turin sawrkarah ngenna an thlen leh a ni.

SCHOOL COMMON UNIFORM

SIKUL              KEKAWR/PAWNFEN                                       KAMIS

Primary           Kekawrtlawn/kawrfual (deep dark blue)       - A var ban bul
Middle            Kekawrtlawn/pawnfen (light grey)                - A var ban bul
High school    Kekawrtlawn/pawnfen - A dum (black)        - A var ban tlawn
HSS                 Kekawrtlawn/pawnfen - A dum (black)         - A var ban tlawn

Primary atanga HSS-ah pheikhawk - a dum (black) vek ruahman a ni.

Sikul te duhthlan tur a dah: T-shirt, school bag, necktie, sweater, blazer, kawnghren leh mawza.