ZALEN August 10, 2026 : ZPM Southern Hqrs. Lunglei chuan vawiin khan chhung inkhawm Party Office-ah an nei a, he huna thusawitu ZPM Vice President Lalmuanpuia Punte, MLA chuan an party inthlan turah boruak tang tak a awm a rin loh thu a sawi a, thusawitu dang Southern headquarter adviser chuan sawi hlawh tak Chief Minister thusawi chu fakawm a tih thu a sawi.

He hun hmanpuitu Adviser tor Chief Minister Lalmuapuia Punte MLA chuan Political Session-ah thusawiin, ATL road siam hna thawh mek chu March 2027 chhung hi chuan Lunglei to Sekhum inkar chu zawh fel vek PWD hotuten an beisei thu a sawi a. Thenzawl atanga chhim lam zawngin an ngaih pawimawh em em ATL road hi a tha thei ang berin siam mek a ni a, siam chhunzawm zel a ni dawn bawk a, nghakhlel taka thlirtu mipuite an tibeidawng dawn lo, a ti.

September chawhnu lamah ZPM Party Assembly neih a ni dawn tih sawiin hruaitu inthlan hun a ni a, boruak tang tak hnuaia inthlan a rinawm loh thu leh General Hqrs. hruaitu tha tak tak inlungrual taka an thlanchhuah a rinawm a, Party mipuite pawh inlungrual a, lungrual taka hruaitu n inthlan ngei a beisei awm a ti.

Muanpuia MLA chuan, FCRA chungchanga Chief Minister hmalakna fakawm a tih thu sawi langin, Mizoram-a Kohhran aiawh hruaitu, CCM (Council of Churches in Mizoram) leh MKHC te nen CM Bunglow-ah meeting pawimawh tak FCRA chungchanga an neih thu leh Kohhran hruaitute nen Memorundum te siam a ni a, Chief Minister Lalduhoma leh Kohhran hrang hrang aiawh hruaitute nen Union Home Minister hnenah Memorundum an siam ang te thehlutin, Union Home Minister pawh hemi chungchang hi zau takin an sawipui a, Union Home Minister pawhin tha takin a lo dawngsawng a, an duh angte bawhzui anih tur thu a lo hrilh hria a, CM hmalakna hi a lawmawm a, India rama Minorities te an lawm hle a ni, a ti bawk.

Political Session-ah hian ZPM Southern Hqrs. Lunglei Adviser C. Zathuama pawhin thusawiin, ILP chungchangah Chief Minister Lalduhoma’n zirlaite hma-a a sawi kha thudik a ni a, ILP-ah hian fimkhur a tulzia huaisen taka a sawi chhuak kha a fakawm a ni, a ti.

Chin Hills regulation Act 1896 leh Bengal Eastern Frontier Regulation 1873 kan nei a, he thilah hian India Parliament hian eng dan pawh a amend theih miau avangin, fimkhur leh anihna dik tak thalaite hrilhhretu CM Lalduhawma chu fakawm a ti bawk.

Zathuama chuan, ram intodelh ni tur chuan sawrkar hnathawk siam pun thur thur ai chuan Agriculture Sector lama inpapek nasat a tul viau thu tarlangin, ram intodelh lo ram zahawm an awm ngai loh thu sawiin ZPM Party-in lo neitu leh huan neitute ngai pawimawh a, thlai thar lei kawnga kan hmalakna te chu a ropui a, hetiang zela a kal a, kut hnathawktute tha a tihchak zel chuan a la intodelh thei ngei dawn a ni a ti bawk.