Ka natna—Becca

Kár hmasa pawh khán kan la inhmu reng a; mahse, tùn kár chu class a la rawn kal miah lo. Kan inhmuh hnuhnun ber tum khán a kawm phei zawng kan inkàwm chiah lo a; University atanga ka häw tùr min bye satliah mai kha a ni a. Hetiang thil hi a thleng teh thut ang tih ngaihna pawh ka hre lo … pawh a ni mai lo, ngaihtuahna hun pawh min pe lo!

Zàn ka mut dáwna thiante IG story atang leh mi thenkhat  WhatsApp status atang chauhin a ni ka hriat ve chauh ni—an “Save the date” flyer hi!

Inthàwn thutna chu!

Mi dangin “Beck-i” an tih thin laia keimah chauhin “Becca” tia ka koh ngat thin, Rebecca-i pasal nei “thut” tùr chuan min ti zawi vek a, ka thlarau hi a ti mu vek a, ka mood zawng zawng pawh a mût ral lo chauh a nih chu!

Becca chu ka bialnu a ni lo! Ka thian­nu a ni. Mahse, bialnu ena ka en a ni a; bialpa treat-a a treat ni paw’n ka inhre ve. Kan “nih” lohna chhan ni bera ka hriat chu, tawngkaa ‘Ka hmangaih che,’ tih emaw, ‘Ka duh ber che a, ka thlang ber che,’ tih emaw kan sawi chhuah loh vàng mai chauh niin ka hria. Ani paw’n chutiang chuan a ngaih ve tho ka ring. Kan inthlahlelin kan inngai êm êm thìn … in ka hre ve thìn. Mahse, chutianga ka ngaih chuan pasal a nei dáwn! Thut mai a!

Kan thiannu, Op-i IG story ka hmuh rual chuan zahna, tlàwmna leh inthlahrung zeta thinrimnain ka khat a; zawhna hlïrin ka thluak a luh nghâl zawt zawt bawk. Ka zawi a, ka chau a; zêp nâk emaw, ka ná a ni—ve ringawt a!

Zawhna chu

A pasal tùr hi tu nge? Engati teh thut nge? Engati nge eng mah min hrilh loh? Nau a pai em ni? University gate páwna La Push Café-a ka chawlhpui thin, in-date ni chiah si loa date leh days ka chhiarpui thin hian eng­ati nge an inneih sàwmna flyer pawh min thawn ve loh?

A bialpa chu ka ni chiah lo; mahse, engkim a tihpui thin, project a siampui thin, field study leh survey neia kan chhuah a­pianga a zui tam ber, zirlaiah leh a nuna tanpui a ngaih apianga a ràwn hmasak ber thin, bus-a a hàwpui thin, tûk tina status tùr Bible cháng a thawn thin leh zan tina goodnight message a thawn thin kei hi … engati nge a pasal neih tùr thu hre tùra min duh ve loh? Engati nge kei min kân? Engati nge … engati nge?

Zawhnain ka khat a; chhànna pakhat mah ka hre si lo! Exam-naa zawhna hi, mark 1 pu vek ni se, full mark 1000 zawhna chhàn tùr awm se, mark 0 ka hmu ang!

A nih leh, ka rilrua awm hêng zawhna zawng zawng hi amah chu ka va zâwt dáwn em ni ang? Thil awmzia sawi tùrin ka va ti dáwn nge, ka va be satliah ang? Ka call ang nge ka message ang?

Ka zâwt lo ang! |awngkam khat paw’n ka be lo ang! “A” atanga “Z” inkára hawrawp pakhat pawh hi, a chhiar tùrin ka thawn hek lo ang! Eng mah ka sawi lo ang. Mipa hi—ka ngawi ang!

Eng nge thil awmzia ka zâwt lo ang ka inti a, phone paw’n ka be lo anga ka text hek lo ang, ka inti. Mahse, phone leh ka kutzungtang hian zawm dang a nei—amah Becca-i chu. Mut chu ka mu—meng kurin. Ka phone ka on leh thìn. A message, awh! kan message—kan inbiak­nate chu ka hawng leh thìn a. A la intlar thla dul mai—thui deuhin! Duh lo sateh mah ila, ka chhiar ka chhiar tho nia!

Ka kut leh a message type hi ka hriat loh laiin a lo in-link vek tawh a lo ni a! “Eng nge thil awmzia?” tih te, ti el deuha “In Save the date chu ka save ve lo mai ang!” tihte chu ka type zet a, ka nâwt reh lehnghâl zêl a! Chutiang chuan, nichín ka mut hlim, dár 11 atang khán thu tam tak type-in ka nâwt reh ta—tün, zíng dár thum leh minute sawm pasarih thleng hian! Ka message chu hawng se, “…is typing” rei min ti ve ngar ngar ngawt ang le!

Amah ka thian a ni … si lo!

Becca chu ka thian a ni a; mahse, “thian” tia insawi chu páwnláng ka ti. Ani paw’n pawnlawi a tih ve tho ka ring. College atangin kan inzui chho a. Dik tak chuan—ka sawi sual ka ring lo—keimah vànga MA zawm ve ni paw’n ka hria. Tünah hian MSW third semester kan zir mék. Zirna kawngah pawh, MZU bus chànna hmunah leh chuannah pawh … amah chu ka thian a ni—chu ai maha thûk zâwk chuan!

Ngaihzáwng kan nei lo ve ve a; hmel tha tih záwng kan neih paw’n kan inhrilh tawn mai thìn. Mi dang hriat ve kher tül tih loh “thu” pawh kan nei dùn thìn. Kan phone pawh, password inangin kan lock ve ve thìn. Ka khawvêl a ni mai lo a, ka galaxy leh ka universe ni hialin ka hria—ka orbit chu a ni chiang mai—ka rilru leh ka taksa hêl rengtu chu! Amah chu ka thian a ni—chu aia thûk daih chuan!

Tûk tina min kai tho thìntu a ni a; zíng leh zàna ka husky ui, Leo ka walk-pui loh hlau ber thìntu pawh a ni ang—chhùnah Leo-a chanchin min zâwt fo. Amah chu ka breakfast leh lunch, ka chaw leh ka chawhmeh a ni a—ka chawm lo chauh! “|hian” tih ngawt aia thûk fé-a ka thian a ni.   

Amah chu zàna quote tha tak tak hmanga min mang tha hmasatu a ni ziah a; mahse amah vëk chuan hei, min mang tha hlen dáwn ta a; ani nèna kan thawnthute kha, zial fel a ni dáwn ta…

Ka hre lo vek!

Ka inngaihtuah chiang a. Becca chu ka bialnu a ni em ni? |um khat La Push Café-a coffee kan in dun tuma, ‘Joey, kan ni 'mi?’ min tih tum pawh khán ka chhàn loh kha! Kan nuih dun vak vak rîkngawt kha! A nih leh, amah chu ka tä a ni em ni? Ni lo … ka hre lo … vêl nuai!

A nih leh, a pasal neih tùr dang thei khawpa a nuna mi pawimawh ber ka ni em ni? Chu pawh ka hre chuang lo! A nuna mi pakhat chu ka ni ve, tih erawh ka chiang.

A nih leh … dang leh, engati nge a pasal nei tùr chu ka lo thîk ve êm êm si? Ka thîk phâk a ni em ni? Ka hre lo le! 

Ka duhzia leh ka hmangaihzia … (?) nge, ka ngainatzia zâwk—ka hrilh loh avànga a beidawngin, mi dangah min tuansan ta zâwk mai em ni ang? Ka hre chuang lo!

A nih leh … dang lehzêl, a pasal neih leh neih loh thu-ah thu ka nei ve rëng em ni? Ka hre bîk chuang lo!

Khítah khian ka sawi tawh khi—zawhna awm thei zawng zawng chhànna ka nei lo vek a, ka hre lo fai vek bawk!

Leo chauh

Zíng dár li a pèl ta. Káwl a ëng tan tawh. Ka la mu lo. Ka la chhíng eih lo. Duh lo chung chungin WhatsApp leh IG lama kan thu kal lam leh häw lam chu ka chhiar ka chhiar mai. Mahse, káwla ní a chhuah rual chuan chûng kan inbiakna zawng zawng chu, amah chawpin—ti ila, a number chawpin ka tihna—ka phone atä ka paih bo ta vek a, ka clear vek a, a block theihna apiangah ka block vek ka tihna a nih chu. Ka hriat rengna atangin amah chu eng tikah nge ka clear theih ang tih erawh ka inhre lo!

Ka mutna sír maia mu thìn, ka ui duat leh min hmangaihtu Leo-a chu a la mu bîk lo tih ka hre reng; mahse, ka ngaihsak peih tlat lo! A pu hi zan khuaa ka hui pap pap vàng ni ang maw? A mit meng tle varin a tlaivár ve thak a ni lo maw le? A pu natnaah hian a na ve nge ni dáwn ni?

Leo chuan Becca chu a hmu tawh a ni mai lo a, a ngaina ngang mai. Becca paw’n a ngainain a làwm tak zet. Ni lo se, chhùna kan inkawm chángin zíng leh zàna ka walk-pui leh walk-pui loh thu min zâwt fo lo ang.

Tûk dang ang lo takin Leo chu a rawn tho chhuak thuai a. Becca message leh number ka paih rualin a ni ka khum a rawn pan ni!
Min rawn liakin min nawr sek a. Walk-pui tùrin min rawn sáwm a ni ang. A turin min tur a ni ber. A mei erawh a thên lo!

Chumi tûk chu, ka tán paw’n tûk dang a ang bîk chuang lo—Leo lawm châkna pakhat mah ka nei lo! Zíng walk-pui phùrna them të pawh ka nei lo. Chhan pahnih a awm thei ang—na tuarin ka tlaivár. A dang leh chu, Leo làwm êm êm thìntu leh zíng leh zàna ka walk-pui leh walk-pui loh min zâwt thìntu kha … sawi tawh lo teh ang!

Sawi leh lawk si ang! Engati nge Leo ka walk-pui leh walk-pui lohah khán Becca kha a lo buai ve êm êm thin le? Engati nge zanriah ei khama ka walk-pui lai khera min rawn call kher thin? Ka laka game khelh nán mai mai a ngaina der nge a ngaina ve tak tak? Nichin leh khita ka sawi tawh ang khian—chûng zawhna chhànna chu … ka hre chuang lo zêl!

A aiawh tùrin Leo hi min lo hmangaih “luihtír” a ni thei ang em, tihte thleng thlengin ka ngaihtuah. Amah chu mi dang tä tùr tih leh, ka neih chhun leh ka hmangaih theih awm chhun chu Leo chauh hi a ni tih, tawngkaa sawi chhuak kher loin min vawn lâwktír a lo tum reng tihna a ni ang em, tihte pawh ka ngaihtuah ta zêl a nih chu.

Inphih harh tùrin ka tho ta nge nge a. Ka khum kianga zan hmasaa ka lehkhabu chhiar zawh lo la let ngát chu ka hmuh zin tehlul nèn—ka’n hmu chiang lehzual khawp a! Becca thawnthu bu ka hawhsak, David Nicholls-a ziah, “One Day” kha. Kum 20 chhúng tehmeuh mai thian aia thûk fé zâwka inzui tawh, Emma leh Dexter-te chanchin—Emma-i’n pasal dang a neihsan hnua Dexter-a nuna hmun ruak zau ta lutuk thawnthu kha!

A káwmah chuan a neitunu thlalâk a chuang ta emaw tih mai tùrin Becca lehkhabu chu ka thlír ngun a. Ka thlìr ngun tluk zetin Leo chuan min lo thlír ve reng bawk. Ka walk-pui ngei chu a ngai a ni. Ni e, amah chauh chu ka khawvêl a ni ta si a! Thawnthu hmasa chu!