Thutiam mak, mawi leh duhawm

Cleo leh Leo, Joey leh Lenny—kan hming a in-rhyme fuh vêl vek ang chiahin Sap tawng zirtírtu Cleo-i nèn pawh chuan kan in-rhyme fuh chho zêl a. Kan mizia chu a inang hauh lo; mahse, ka sawi thiam si loh inmil riauna kan nei tlatin ka hria. Hei pawh ka hria—a nunin hliam a tuar ve. Mahse, hei erawh ka hre lo—eng hliam nge a tawrh ve, tih hi.

Ka hriat lohna chhan chu, kan inkawm tan zàn, kha Thawhtan zàn khán thil pakhat kan intiam a; chu pawh chu ama rawt chhuah maw le! Chu vàng chuan a nia, ka chanchin hi a hre sa em ni chu aw … ka tih fo ni—hliam tuar zo hlim ka ni tih hi.

Khami zàn—kan pahniha kan zan khatnaah khán a nia, thu chu kan tiam ni—Hmáwng küng hnuaia zan dang ai féa rei kan thut dun hnu, kan hàw dáwn hnaihah chauh khán.

‘En teh Joey, a mak ngawt mai, Leo leh Lenny te vàngin kan han inchhar a. A mak. Làwmawm ka ti…’ a ti tê tê a nih kha.

‘Nia ti raw? Thlànmual kawngah kher kher lehnghâl!’

‘Ih … thil pakhat. Ah…’ Hnuai lam a bih leh daih a.

‘Eng thil pakhat maw?’ ka ti hú.

‘Thil pakhat min tiam la ka duh a—ve ringawt a! He he!’ a nui suk a. ‘Ti’an inkàwm ila; mahse, kan natna tawrh emaw, nun hlui emaw … ahh … inzawh awih miah loh aw?’

No–pangchang–ka remtih loh hlau–lai anga lan tum lo lui–tim chuih chuih–ka “aw” ngei beisei melh takin min rawn melh chho há a.

‘A tha ngawt ang. Tak tak aw…’ ka ti a. A phür zâwkah ka tang emaw tih mai tùr ka ni. Cleo chu ka va tiam chiang tak—chu thu—nun hlui inzawh awih loh thu chu!

Chu thutiam chu ka tán chuan thutiam mak leh mawi a ni chiang mai! A chhan chu, Becca kha sawi chhuah leh ka duh tawh lo tak zet a; tù mah sawipui emaw, hrilh emaw pawh ka duh lo. Chuta min tanpui tùr chuan Cleo hi angel angin a rawn inlár ni berin ka hria. Chu vàng chuan a rawtna thutiam kha, kei ka tán chuan a duhawm tak zet bawk.

English literature-a MA zir chhuak tawh a ni a; keiin English contemporary writings leh classic poetry ka lo tuipui ve bawk nèn. Chumi zàn atang chuan kan khawvêl rit tak chu, thu leh hla hmangin khawvêl tharah kan din a—zalèn kan ni ta!

Robert Browning leh Elizabeth Barrett Browning te inkár thu atanga Kiran Nagarkar-a “Cuckold” te, Tennyson-a poetry atanga Rithvik Singh-a “I Don't Love You Anymore” lehkhabu thlengin kan háwl a—lei kan inhàwlsak hma hauhin! Chutiang lehkhabu kan sawi chhuah lai chuan, David Nicholls-a “One Day” bawk kha … a rawn sawi chhuak palh reu reu ang tih ka hlau et et—thian aia thûk zâwka inkàwm thìn, nupui pasal inneihsan tate thawnthu kha.

Thil pakhat, mak intihna deuh ka nei—Cleo bula ka tawng duh thar ta thut hi! Tú bulah mah—Becca bulah pawh—hetiang hian ka tawng luam ngai si lo a. He angel hian ka mizia zawng zawng min thlâksak vek a nih ber hi!

Hlimna thar kárah khawharna thar ka chhar

Cleo nèna kan intawnna leh nun thar kan chhar dunna hmun chu thlànmual panna lamlian a ni mauh mai si a. Chu hmun—tap chunga miten an zawh thin lamtluang chu, keini chuan hlim takin kan chhui dùn thìn. Mittui nèna an hmangaihte an thlah liamna kawng chu, hmanngaihna dik chhar tùra kan zawh thin kawng a ni lawi a. A mak a ni, a mak!

Zan tin dár 7.15-ah thlànmual chhaka Hmáwng küng dinna chu kan thleng ziah thìn. Becca block-a ka nun ka lo chhüng ruak vek te kha, Cleo leh literature tán ka lo dah ruak lâwk a lo ni tih te ka inhre chhuak zêl a. Ka nun chu a hlimin a käng awk awk a ni ber mai.

Kan thutiam kha—nun hlui sawi chhuah loh kha—kan vawng dùn tlat a. A tìr chuan min ti hlim viau mai; mahse, kan thutiam chu, kan inkára khì siamtu, langsàr si loa min phuar bettu leh min daidangtu bang chhah tak nia hriatna ka nei ru tlat a! Chutia ka sawi avàng chuan Cleo-i chu ka ringhlel tihna a ni lo a; ani paw’n min ringhlel hran bîk lo ang. Mahse, kawng engkima kan inpawhna tùr min dàltu ni tlatin ka hria—ka sawi thiam lo!

Zan khat chu, March thla chawhma lam, fùr intan hma si a ni a; ruah a hmi seng seng. Leo chu a zawi riau mai. Kan chhuah luihpui tho a. Chumi zàn chuan Lenny leh a pi, Cleo te chu ka hmu mai lo; khaw nawm loh vàngin an lo kal lo a nih ka ring.

Hmáwng küng dinna kan thlen hnu lawk chuan Cleo chu a rawn lang hlawl—amah chauhin. A hoodie hâk chuan a lu a khuh a, mask a rawn hréng leh; a hmél pawh a lang chiang thei mang lo. ‘Khaw’nge Lenny?’ ka lo ti nghâl thuai a.

Thaw dêp dêp chungin, ‘Joey, Lenny a dam lo a,’ a ti! 

A âw atang chuan a lungngai a ni tih ka hai lo; a zäm hle tih pawh. ‘Zanin chu ka lêtsan lehnghâl mai ang che u. Rawn hrilh hrim hrim che ka duh sia … hmaichhanah ngei,’ a ti.

Kár khat dáwn Cleo chu a reh ta. A phone a switch-off reng a; IG-ah a active bawk si lo. Becca ka kalsan hnu khán ka dam nán angel Cleo ka tawng a. Mahse, tünah Cleo chu a reh leh daih si! Ka nuna hmeichhe pahnihte kha, thlarau ang maiin an bo leh mai chu a ni ta! Ka khua chu a har thar leh a…

A hnuah, kan K|P member pakhat hnên atangin Cleo-i leh a ui chanchin chu ka hre ta hlawl mai—Lenny chu “parvovirus” (ui hri) vàngin a lo thi daih tawh chu lo niin!

Chu thu chuan min tháwng tak zet! Engati nge Cleo-i chuan min hrilh ve mai loh le, tiin zawhna bawk chuan ka rilru a luah leh—chhànna chhawm lo zawhna ang chi khân!

Cleo chu ka tawrhpui hle mai a. Hnem te pawh ka duh viau; mahse, biak ngaihna ka hre si lo. An in ka hre bawk si lo. Mî zawh ka ngam bawk si lo. An chanchin min hrilhtu kan thianpa takngial pawh an in awmna lai ka zâwt zak nia!

IG leh WhatsApp-a ka biaknate chu, chhànna nei lo thu thawn an chang zêl mai si a! Cleo nèna min suih zawmtu ber, Lenny awm ta lo chuan ka khua chu namén loin a ti har tak zet zet a ni.

Min zawmtute kha!

Ka nun chu a zawi leh ta vek! Keimah ang chiahin Leo-a pawh chu a zawi ve ngawih ngawih. Ka class báng pawh min lo làwm peih ngai lo. Han buaipui ngaihna vak ka hre si lo. ’Bâkah ka chau tlat a. A mak lutuk hei, kan zawi dùn ngawih ngawih a nih chu—Leo nèn chuan.

Zah ka sawi thei tawh lo; kan K|P member, ka thianpa—Cleo-i hretu chu ka phone ta hlawl—ka ui dam loh ve thu chhuanlama siamin. An in awmna ka zâwt a. Ràl ka duh thu ka hrilh bawk. Ani chuan Cleo-i chu an kawmchhak lawka mi in an luah thu leh an in luahna lai tak chu min hrilh ta a.

Chumi tûk chuan a peih lo chung Leo chu ka hruai lui a; Cleo-te in chu kan pan ta rawih a.

Cleo-te in ka thlen chuan rei ngial kawngka bulah ka ding a nih chu—ka kik ngam lo! Leo erawh a vir sek thung. A ngur chhur chhur reng bawk. “Nêp-a!” ka inti a; kawngka chu ka kik ta nge nge e.

Cleo ngei mai chuan kawngka chu min rawn hawn—a phak ngang mai. Mahse, a hmel thatna erawh a rehin a chuai chuang lo. Zíng ka harh ruala ka hmuh hmasak ber thin, ka kianga mu thìn atána ka duhna chu a bo chuang lo. Ka duhzia chu … ka sawi ve thiam lo!

Ka zawh ngai loin Cleo chuan Lenny boral avànga mi dang leh ui dang hmuh a hreh thu min hrilh a. Chutia a tawng mawlh mawlh lai chuan Leo chu Lenny mut thinna ni ngei tùr lamah chuan a tei sek a. A vir reng a ni ber e. A thianpa awm ta lo chu a hre thiam lo a ni ang.

Kan tìtî dùn reng a. Khawvêl thar din kan duh thu erawh kan sawi lo a; kan thutiam kan la hlen zêl leh hlen zêl loh lam thu a leng lo a ni lo, sawi a rem lo. Lenny leh Leo chungcháng hlïr a ni kan sawi ni—min zawmtute chanchin chu.

Cleo sawi hmangin, vaccine la kim tawh Leo tán paw’n, Lenny hrik kaina chance chu a lo sáng viau tho mai a. Virkon S powder-a bual vat tùrin min ràwn a; Zemabawk lama ran daktawr va hmu thuai tùr paw’n min ti bawk.

Tûk tina thingpui lum sa, thlum sa, in sa lo chauh min lo chhawpsak tùra ka duh ber Cleo chuan thingpui min lumsak a. Tui ti takin ka in. Min lumsaktunu tak chu a nia in ka duh tak zâwk chu! Chutiang lam tih chu a rem rih si lo!

Cleo chuan Leo bualna tùr, Lenny hman bàn Virkon S chu min hawntír lehzêl a. Zemabawka ran daktawr min hmuhpui pawh a inhuam hle. ‘Ka chau lutuk hi sikul pawh ka chàwl tawp. Mahse, Leo damna tùr a nih dáwn phawt chuan ka kalpui ang che,’ min ti. Leo dam nán chauh ni mai lo se … ka va’n ti tel tak!

Hàw vêleh Leo chu Virkon S powder chuan ka bual nghâl a. A harh ve deuh. Ngaih tha deuhin class ka kalsan a. Ka rilru erawh chuan a kalsan thei chuang lo—amah Leo chauh lo pawh chu! Tlai lama ran daktawr hmu tùrin appointment pawh ka siam fel sa vek a. Mahse, ka awm a nuam thei chuang lo. Last period ka la nei zui lehnghâl!

Ka häw chuan kan kawtah chuan Cleo chu a lo ding vàng mai. Min hmuh rual chuan min lo nuih ver ver … tawh lo! Hnuai lam a bih a, a tap! A tap chiang mai, Cleo hi!

Ka ding dawt. ‘Cleo!’ tiin ka au chhuak vak a.

Ka lam panin a rawn tlän a. ‘Joey, Leo chu daktawr hnêna hruai a ngai tawh lo…’ a ti a. A aia uar zâwkin a tap ta hawm hawm a—nasa takin a ni a tah ni!

‘Min zawmtute chu an awm ta lo ve ve i tihna a ni maw?’ ka ti a, ka chháng a. Min chháng ve lo!

Cleo chu ka kuah a. A perfume duh ber, Victoria’s Secret Bombshell rim a nam cham cham a. A T-shirt-ah chuan ka mittui chu a dïr zur zur a…