Friday the thirteenth

Ka smart watch chu ka en zawk a. Vawiin, March ni 13, Zirtàwpni a ni. Saphoin “Friday the thirteenth” an tih thin, vànduaina tawn ní anga an ngaih a lo ni chiah mai ka ti! Chu chuan ka thau a man tlat a. Tin, ka chunga thil tha lo, eng emaw tak thlen ní … emaw, a thlen ní tùr emaw nia hriatna ka nei tawh tlat bawk … em kha le?

Cleo chuan inah min kuah lût a. Leo chu a mutnaah an lo muttír bém a. Ka va han lainat tak zet tak! Kùnin ka thingthi hnawk. Leo chu ka pawm vawng vawng mai. A lum tawh lo! Ka nu leh ka nau pawh, Leo sírah chuan an lo ding ve reng a. Ngawi reng­in an mittui a lo hru ve mék a ni.

Kawmthlanga kan huana phùm mai kan rilrûk a. Ka thian hnai zual, Leo hre chiangtu mi pathum pali vêl ka phone a. Phone ve ngei tùr, Leo ngaina êm êm thìntu mi pakhat a awm ve tih ka hre reng—Hriat­rengi —hrilh tül ve miah lo kha!

Ka thiante chu an rawn thleng tak tak hlawm. Suahdúr, bawngtuthlawh leh thïrtiang an rawn inken vek a. Leo phùmna tùr hmun kan tih fel rual chuan, ‘Ka’n chêk hmasa ber ang e aw,’ ka ti. Vawi khat bawngtuthlawhin lei chu ka’n chêk a. Zah pawh ka sawi thei lo—ka tap a nih chu!

Thiante chuan ka bawngtuthlawh ken lai chu min chhuh thuai a. Ka laih ve phal loin anni chuan an lai ta vek a. Chu thlàn khurah chuan a ni, ka síra mu tawh loa Leo chu a mut tawh dáwn ni!

Chutia ka inngaihtuah lai chuan ka phone a rawn rî. A rî (tone) chu a dang tlat. Ka en a. Reminder a lo ni a. Heti hian ka lo chhinchhiah chu niin—

“Becca’s Wedding @ 3 p.m.”

Chutah, kan thiannu Op-i story ka chhànna: “Friday the thirteenth-ah kher maw!?” ka tih kha ka hre chhuak zawk bawk.

Becca chu khawiah nge a awm?

Phone chu ka ak lehnghâl. Ka ngawi vung vung a. Thiante hnênah chuan eng mah pawh sawi loin inah ka tlän chho vut a ni àwm e—a hnua min hrilh leh dànin.

Kut ka sil sawk sawk a, ka hmai ka hui pawp. Kan in piah deuha two wheeler taxi stand chu panin Becca te inneihna tùr biak in lam panin ka tlàntír nghâl a.

Chutia two wheeler taxi-a ka chuan lai chuan, Michael Learns to Rock hla, “25 minutes” te kha ka hre chhuak a. A lung lai luah­tu—amah lo la nghâk fan fantu pasal neihna tùr biak in kha, a changtupa khân minute 25-in a thleng hman lo a, a tlai ta nih kha.

Minute 25 vêl ve tho kan tlàn hnuah Becca pasal tùrte lawina kohhran biak in péng, Aizáwl véng daiféma awm chu kan thleng ta. Biak in lam pan chuan ka tlän vak mai.

Mahse, biak in chhúng leh páwnah chuan tù mah an lo awm lo! Ka sana ka en a. Dár 3.42 chauh a la ri si. Thlá pawh an la lo em ni? Thingpui pawh an in lo em ni? Ruai pawh, biak in hall-a theh nghâl tùr an ti si a!

Biak in hnuaia chowkider awmna lam panin ka chhuk thla nghâl. Chowkider thu min hrilh chuan min va’n tháwngin min va’n ti hrilhhaiin ngai êm! ‘Mo tùr Rebecca Lalhriat­rengi kha … a pasal tùr hi a duh lo nge pawh ka hre ve chiah lo. Mí sawi dàn chuan, “Biak inah a kal duh lo,” an ti a ni àwm e,’ chowkider chuan a ti a nih chu!

Engtik laiin nge Becca hi ka nunah ka lo koh kìr leh hmana, engtik laiin nge phalna ka pêk rëng rëng? Engtik laiin nge ani pawh a rawn lêt leh le? A chhànna chu a la ngai reng—“Ka hre bîk chuang lo!” tih tho kha.

Engtik laiin nge Becca te in chu ka thlen tih ka inhre thiam tawh nuai lo bawk! Mahse, two wheeler taxi thoin min phur thleng tih chu ka inhria. Rui si lo hian a va chawmawlh theih tho si êm! Mahni leh mahni pawh ka inhre thiam zo teh nuai tawh lo a nih ber hi!

Becca te in, vawi tam ka luh chhuah thinnaah chuan ka lût leh a. Hlim taka min lo làwm thìntu a chhúngte emaw, amah Becca hmél emaw hmuh tùr an lo awm lo! Pakhat të mah an awm lo—hmän atä tawh an awmpuinu la ni ngar ngar Muangi tih loh chu! Ani chu chokaah a lo thu ngawi reng a.

‘E he! Jo-a chu!’ tiin ding hluaiin Muangi chuan muang fán raihin, hrilhhai tih hriat takin min lo ko var a.

‘Khawiah nge Becca-i? Khaw’nge i pi leh pu … mi dang…’ 

Ka thâw a dik thei lo! Vawiina pasal nei tùr, tu emaw mo ni tùr chu biak inah pawh, an inah pawh a awm lo a nih chu!

Muangi chuan mi pawh a chháng lo—nge, a ngam lo zâwk pawh ka hre lo! ‘A bo 'mi!? Khawiah nge Becca chu a awm?’ ka ti leh that.

‘Pute damdawi inah an phur a…’ a ti muang fán ral leh raih ringawt!

‘Engati nge, Muangi?’

‘Bathroom-ah a tlu a. An chhar a. A la thàw!’ hlau zetin Muangi chuan a ti leh.

“I tlai ang e aw…”

Choka kawngkhàr chu ka khär ri thuai a. Becca pindan lam ka pan nghâl. Ka ri phei buan buan mai.

Becca pindan chu a lo hnawk nuai a. A khumah chuan a mo thuam te pawh chu a inphah niai nuai mai. A bathroom kawngkhàr ka hawng leh thuai a. Thil danglam ka hmu lo. Ka’n en chiang leh deuh a. A bathroom chhúng dárthlalang hnunga inthukru deuha chhuar të awm chu ka hawng. E khai le!

Chutih lai chuan, Becca pindan kawngkhàr chu a rawn inhawng. Bathroom atang chuan ka dâk chhuak nghâl. Becca chhang chiah, Moses-a a lo ni.

Becca tih loh hi chu an chhúngkua hi an han medical hlawm khawp a. A pa hi sawrkar daktawr pension, a pension hnua damdawi in dintu a ni. Becca chhang chiah Moses-a hi ZMC-a MBBS zir lai niin an naupang ber, Priskil-i pawh RIPANS-a nurse zir lai a ni bawk. A nu pawh Health worker pensioner.

‘E he, U Jo!’ Moses-a chuan mak ti deuha min en chungin min bia a, ‘eng mah chanchin pawh kan la rawn hrilh hman lo che a ni.’

‘Ni e. Moses, eng nge thil awmzia?’

‘A insiam bathroom-a a lût kha a rei lutuk a. Kan auhin a ei thei si lo a. Kawngkhàr kan ti chhia a … Saw lai, a commode-ah sáwn a khabe nghatin a lo bawk reng a!’ tiin Becca European type toilet chu a kâwk a. ‘U Jo, ka ú hian damdawi a ti thìn tih i hria em?’

‘Chuan, Moses … ti chuan eng tin?’         Moses-a min zawhna pawh chu ka chháng lo tih ka inhria. Becca din hmun chu hriat vat vat ka duh a ni.

‘A … daktawrte sawi dàn chuan stroke leh …’ A ngawi ta daih a.

Kei chuan hmanhmawh fé-in, ‘Stroke leh … eng? Stroke leh eng maw?’ ka lo ti chùl a.

‘A … stroke leh heroin overdose!’

Becca dárthlalang hnunga chhuar të atang chuan palang búr të, a chhúnga heroin tlém la awm chu ka va la chhuak a—inchiuna, insulin nèn. Moses-a pêk pahin, ‘A tih bàn a ni ngei ang,’ ka ti a.

‘Ni e U Joey, min hre thiam la. Rilru a mang vek a ni. Kan va hmuh chuan a mar a la awm a ni chauh a. A phone a lo la hùm reng a. A rang a rangin ka pate damdawi in lamah kan phur phei nghâl a. Tünah pawh a la harh lo. Mahse, a Bp chu tlémin a käng ve deuh,’ tiin Moses-a chuan thil awmzia chu min hrilh fiah ta a.

‘A phone chu khawiah nge?’

‘A lock a. Ih … E! A drawer-ah kan dahin ka va hre e…’ a ti ban charh a. Becca khum bula a drawer lam chu a pan a; keiin ka zui a.

Becca phone rawn phawrh pah chuan, ‘Hei, a la awm aläwm,’ tiin Becca phone an switch off tawh chu min pe a. Ka ti nung mai a. Mahse, a nau sawi ang chuan a la in-lock.

A password kha … a la hmang ang em aw…?

“1303” ka type. A la dik chiah mai ka ti!

A wallpaper erawh a thlâk tawh. MZU gate kianga kan thlalâk dun kha zu hmang teh tlat a! IG-a a message ka en. DM min rawn thawn a tum, thawn theih loha fail-ho chu ka chhiar zung zung a. Becca hi ka va’n lainat tehlul êm! Min hmangaih êm êmtu a ni tih hi, engati nge a awm tawh loh hnu hian ka hriat ve chauh mai le? Ka thiam loh vek a nih hi!

Ni e! Ni e! Ka thiam loh vek ni e! Eng mah sawipui duh loin ka block aläwm! A mangang au aw hre duh lo lui ngat kha—keimah hi ka ni. A thu leh hla ngaihchàn ngaia ngai lotu pawh keimah tho! “Joey … vawi khat chiah inhmu leh ang, plizzz…” tia March ni 3, Thawhlehni chawhma dár 10.05—aw, ka block ní-a IG-a min rawn DM tumtu thu type hi, a awm tawh loh hnuah a ni ka hmuh ve chauh ni!

Vawiin hi March ni 13 a lo ni ta reng mai. Ni e—“13-03”—e khai le! Ni 13, thla 3—kan password kha! Ka man ve chiah a nih chu! Mahse, Becca hian kum tìr khán password-a hman dun a rawt daih tawh! Ka buai leh ta!

Vawiin chawhnu dár 2.08-a a message chhut, a la chhut zawh loh hi Becca Hriatrengi thu hnuhnung ber a ni ta mai si a maw… Chu thu dawng tùra thawn a tum chu, tu dang ni loin keimah tho hi ka ni! A message type chin chu: “Joey, ka hmangaih­zia che hi hre hman loin i tlai ang e aw… Kei chuan, nang lo chu, mi dang … tu mah, pasal…” Chhuatah ka thu hnawk a. Ka tap thei lo—tah ka châk tehrëng nèn!

Moses-a chuan min kai tho a. Damdawi ina ken ngai thil chu a fawm khâwm zung zung a. Nikhaw hre loa awm mék, engtia rei nge chutianga a awm dáwn tih pawh hriat loh,  Becca hmu tùr chuan Moses-a chuan a car-ah min phur ta a.

Damdawi in ICU kawta lo thu—Becca nu te leh thian thate chuan min lo chibai hlawm. A nu phei chuan min tah khum  lo chauh!

A piah deuha ngawi renga mask vuaha lo ding chu tu nge a nih ka hria! Ka hmuh duh loh ber mai chu ka hmuh duh loh berna hmunah ka hmu ka ti! Mask hréng eng ang mah se amah ka hre chiang tawh bawk a; amah a ni tih ka chiang. Ngawi rengin Cleo-i dinna lam chu ka pan phei ka tum a…