Tün tum chu, khawvêlin a hriat làr mi pahnih chanchin kan sawi dáwn a. Keini lam thleng thleng an chanchin hian a thleng pha miau a, mi tam tak tan chuan, “thawnthu hlui” pawh a chang maithei. Mahse, Mizo tawnga han dah chhuah ve hrim hrim hi tha ka ti a. Tin, kan sawi tùrte chanchinah hian, “hmangaihna thawnthu ngaihnawm” leh, “chhúngkaw inhmangaih tawnna thawnthu” hmuh hmaih rual a nih loh avàngin, lo sawi tawh an awm a nih pawhin, sawi nawntu nih hi ka hreh lo a, zahah ka la hek lo!

A tìrin

Hmân lai hian, Argentina khawpui, Buenos Aires-ah pa pakhat a awm; pa rethei tak chu. Chu pa, a hming Jorge Rodríguez chu, chu khawpuia piang leh sei lian a ni. Football pawh a khèl ve thìn.

Kum 1994-ah Spain panin football-a ei zawng tùrin a kal. A hnuah phei chuan Spa­nish club, Jacetano coach a ni zui dèr mai. A hetih lai hian Murcia, Spain khaw chhùl chhuak Ana Maria Hernandez nèn intawngin an innei.

A hnuah a nupui Anna Maria hi Buesnos Aires-ah a pèmpui leh. May 21, 1992-ah fanu Ivana Rodríguez an nei. Kum hnih hnu, January 27, 1994-ah fanu dang, Georgina Rodríguez an nei leh. Hetih hun lai hian Jorge hian khawvêla hmeichhe lär berte zínga mi la ni tùr fanu a nei tih rëng a la inhre teuh lo ang!

Chhúngkaw boruak hrisël lo atanga lo sei lian

Hemi hma hian Jorge hian tù tih hriat loh lakah fanu a lo nei tawh—Patricia Rodríguez a ni. Georgina aiin kum ngain a upa zâwk. Ani hian a laizáwn (step sisters) dangte hi a mil lo ngang mai! Social media lamah Georgina chu hmeichhe duhäm tak, a harsat ber lai pawha tanpui duh miah loah a puh hmiah!

Georgina leh Ivana te hi chu an inkàwm ngeihin an induhsak tawn êm êm reng. Tùn hnua Georgina a lo làr tâk hnu pawh hian, Ivana hi hmun hrang hrangah a hruai fo thìn. Ngaihnawm lehzêl chu: Ivana hian Cristiano Ronaldo thian tha tak, thil kher thiam, artist lär tak Carlos García lakah fa pahnih a pawm ve nghe nghe.

An chhúngkaw boruak hi a “hrisël” lo hle. An fate naupang të an nih laiin Jorge hian a chhúngte a chhuahsan a ni àwm e. Georgina hi kum khat mi âwrh a nihin a nu chuan Spain-ah a pèmpui daih. Spain hmàr chhak biala khaw pakhat Jaca-ah a fanute hi a hmeithaipui zui ta a ni. 

Mahse, pa ber Jorge hian Spain lamah a chhúngte hi a rawn zui ve leh ngat. Mahse, an chhúngkaw boruakin hrisèl lam a pan thei chuang si lo! A nupui, Anna Maria nèn hian an inthen hlen ta nge nge a ni.

A hnu daih, kum 2003-ah Jorge Rodríguez hi cocaine tawlh rua puh niin Spain-ah man a tâwk nghe nghe a—kum 10 chhúng lung ina khung a ni.

Georgina hi kum li mi a nihin làm (ballet) a zir zet a; mahse, zir zawm zêl tùrin an chhúngkaw neihin a tlin si lo! Kum 18 mi a nihin Madrid a pan tawl. Dàwr te a nghâk a; kár tàwpah bar-ah te a inhlawh lâwp lâwp thìn. 

Mahse, a hmel leh pian a chhe lo thlâwt a; fashion giant-ho mit a fu thuai mai. Khawvêl huapa fashion magazine lär Vogue, Harper’s Bazaar te leh Elle international editions káwm (cover) pawh a lo màwi fo tawh. Modelling lama ke a chheh rual hian influencer a ni pah bawk. Netflix chuan docu-series “I Am Georgina” an siampui nghe nghe. Hetah hian, “puanzàr phèna” a nun chu Georgina hian a phawrh chhuak ta a ni.

A bâk, Georgina khawvêl chu, kan hre viau tawh tho a; mahse, kár lehah kan sawi chhunzawm ve hrim hrim ang…

Naupang riangvai

Portugal rama Madeira thliarkára khaw lian lo tak, Funchal khuaa piang naupang pa­hnih, inthenawm hnai të-a awm, José Dinis Aveiro Dinis-a leh Maria Dolores dos Santos Aveiro-i te chu naupan lai atanga thian inkàwm chawt; inthlah meuh lo an ni.

Tleiräwl engkim hre rual an ni chho a. Maria Dolores-i zâwk hian a têt lai thian, José Dinis-a chu, a mipa hmuh tawha zawnga “pa” a la tih ber thu leh hmel tha a tih ber thu a sawi chhuak ta phawng mai. Chutin, kár loah an “ni” zui ta rëng a! Rei an inzui hmain kum 1975 khán an innei ta nge nge a ni.

An inneih kum hian an fa upa ber, Elma Aveiro chu a piang a. Mahse, chumi hnu lawk chuan, José Dinis-a chu sawrkár sipai, Portuguese Army-a a tan a ngai ta tlat mai! Angola leh Guinea-Bissau tualchhúng buainaah pawh José Dinis hi a zuk ram tang ve a ni.

Indona atanga a lêt leh hnu thleng paw’n, indonaa a thil tawn leh a thil hmuh rapthlâk tak takte chuan a rilru a la tháwng a; mang lamah thleng thleng a hmu chàwl thei lo! Hei hian nasa takin a rilru a ti buai thìn. Tùnlai medical tawngkam takin Post-Traumatic Stress Disorder a neih phah ta a ni. A chhâwk nán tiin zu in nghek nghekah a tlâk phah ta hial! Hei hian an chhúngkaw nun phung a nghawng pawi hle.

Sipai atanga a bàn hnuah fa an nei chhunzawm; Hugo (1975), Kátia (1977). Madeira-ah huan enkawl hna te a’n thawk lâwp lâwp a. A hnuah an ram football club Andorinha-ah “kit man” (inkhèl mite thawmhnaw enkawltu) hna a thawk zui. Hei hi, a fapa Cristiano Ronaldo tána football zin kawng hawnsaktu pawimawh tak a ni zui nghe nghe.

Piang lo thelh fapa rangkachak ni ta chu

Maria Dolores dos Santos Aveiro, hian a autobiography “Mother Courage” (2014)-ah khán a fa naupang ber—vawiina mi tin hriat—Cristiano Ronaldo piantír loh a tum thu a ziak mauh mai!

Chhan pahnih a ziak—ei leh bàr kawngah harsat naménin an harsa lo a; an chhúngkua hi “rethei” tih piah lama mei alh en tùr pawh nei zo lo dáwn khawpin an khawsak si a. An fa palina lo piang tùr chu chàwm zo dáwna an inhriat loh vàng a ni!

A pahnihna chu, a pasal, José Dinis Aveiro-a, tui leh chawa zu ring lo chauh a nih vàng a ni. Maria hian an chhúngkuaah innghahna tùr a nei hlawl lo!

Maria hian Ronaldo a pai lai hian daktawr a pan ngat—tih tlâk tumin! Mahse, daktawr chuan a thil tum chu thulh tùrin a ngèn tlat a; ‘He nau lo piang tùr hian hlimna tam tak a rawn thlen dawn che a ni,’ tiin a lo hrilh.

Daktawr-in a remti lo chung paw’n Maria Dolores hi a la beidawng duh chuang lo! A fa pai lai chu in lama tih tlâk tumna lian tak a la nei cheu! A thenawmte thuràwn angin beer a in tawk tawk mai. Chu mai chu duhtâwk loin a taksa chu rim takin a sawisa a—excercise a lâkpui ni loin, a pum chhúnga naute tih chhiat tumna—“exertion” a ni mah zâwk! Mahse, chûng zawng zawng chu an hlawhtling lo vek!

Kum 1985 February 5-ah chuan, an fa tlum ber Cristiano Ronaldo chu a lo piang ta tho a. A hminga “Ronaldo” tih hi a pa sak niin, a sipai tan laia a actor ngaih sàn êm êm, (a hnua US President ni ta) Ronald Reagan hming a chawitír a ni.

Zu in nasa mi ni mah se Ronaldo hian a pa hi a hmangaih tlat a; football khèla zin kawng a zawh tanna Andorinha club-a hruai lûttu a nih vàng pawh a ni ngei ang. Tin, a tum ram thleng tùra fuihtu ber pawh a pa a ni tih Ronaldo hian a theihnghilh ngai lo. Andorinha-ah hian a hman chánga inhlawhin puakphurah a tang ve zawk zawk thìn. Chutih lai chuan, he football club—Andorinha-ah hian a fapa a la khèl ve anga, an club fa chuam a la ni dáwn tih rëng a ngaihtuah pha lo ang.

A fapa Cristiano Ronaldo hlawhtlinna pawh hmu hman loin kum September 2005 khan kum 52 mi niin, Jorgé hi kal leh thin tha lo avàng­in a boral zui ta a ni. 

Kum 2019-a Piers Morgan-a’n Cristiano a interview tum khán, Morgan hian Ronaldo hi a pa thlalâk leh video a entir a; insúm zo loin a mittui a tla hial: ‘Ka hlawhtlinna zawng zawng hi ka nu leh ka chhúngten an hmu vek a; mahse ka pa erawh chuan eng mah a hmu ve hman lo!’ tiin lungchhe vànkaia tap chungin a sawi.

A pa thihnain a nuna thu a sawi

Khatia a pa borali lai khán Ronaldo kha kum 20 mi chauh la niin, Manchester United-ah a khel tan chauh a. A pa thihna chuan a nun leh a miziaah nghawng a nei lian hle. 

A pa hnêna thu a lo tiam tawh: “Khawvela football thiam ber nih” thu chuan a hma aia nasain a nunah thu a sawi lian a. A hma aia nasain a tum a ruh zual sauh. Chumi ti puitling tùr chuan a hma aia nasain tan a la a; a team mate-te aia nasain a thawh pawh a thawkrim zual sawt. Chumi kawnga a hlawhtlinna tinréng chu a pa hriatreng nán a hlàn thìn. 

Rin lawk ang ngeiin, khatih laia a khelhna Manchester United boss Sir Alex Ferguson chuan a pa a boral dáwn khan Ronaldo hi inkhelh chawlhsan a, a pa damlo va tlawh tùrin a tír häw hmak a. He a boss thil tih hi Cristiano hian a zah tak zet a. Ferguson-a zahna leh hmangaihna nasa tak a neih zuitír nghe nghe a; a pa hmun ruak luahtu (father figure) berah a hmang zui hial a ni.

Lo piang ta Maria fapa ngaih dàn

Khatia a nu’n piang lo tùra tih tlâk a tum dàn kha, lo piang ta Cristiano Ronaldo hian a hriatin a nu hi a haw ngawt ang—kalsana tlàn bosan a duh hial ngei ang! Mahse, engtin nge a tih? A nu’n amah hrin tum loa a pai laia tih tlâk a tum tih a hriat khán a haw eih lo—a fiam­thupui mai chauh zâwk a nih chu! A nu fiam nán tak pawh a hmang fo. |um khat chu a nu’n, a fapa Ronaldo thu sawi chu heti hian a sawi chhäwng leh:

‘Ka nu, min tih tlâk tuma i beih nasat vei nèn, tûnah chuan he inah hian ka sum hmangin nuam deuhin i awm tawh a nih hi!’ tiin.

Tuna kan sawi bâk hi chu, kan hre tláng tawh e. Kár leh lamah, a tìra kan sawi Georgina leh Ronaldo “in-ehhemm” tan dàn leh bialnu hluite zuk rìm kan tum ve thung ang.