Khawvêla lengzèm hla chuai thei lo leh lungrun ber páwla chhiar tel reng tawh tùr zíngah, Dolly Parton-i phuah leh sak, “I Will Always Love You” hi, khawvêla mihring kan awm chhúng chuan a tel loh a rem tawh lo ang!

Inngaizáwng, inthen mai tùr hla anga kan ngaih phèna hmangaihna thawnthu ril tak inphúm, a phuahtuin thinlung keh sawm chunga a phuah chhuah—a phuah chhanin mittui nèna a ngaihthlâk a chawh hla hian mihring lung hi a kuai lo thei lo a; ngaihthlâk liam puat atán chuan a pamhmai mah mah thën a la nih reng hi!

“Love song satliah” aia “a love song bîk êm êmna chhan” hi—tün tum chu—hmun ui hlek loin i’n chip chet chet teh ang.

A hring nuna Porter Wagoner a lan hma khán Dolly Parton hi country artist satliah ve mai a ni a, “Zai lama a inhman tak tak hmain hla a phuah ve thìn,” tih leh “Album pahnih a ti chhuak ve tawh,” tih bâk a hring nunah thil ropui inziak a awm lêm lo. 

Tunge Porter Wagoner chu? 

“Mr. Grand Ole Opry” tih hming lem an pêk hial, Porter Wagoner hi country music singer lär a nih mai bâkah artist hlawhtling tak tak chher chhuaktu a ni. Country charts-a lang pha hla hit 81 lai a nei. 1957-ah country star-ho fuan khâwmna, Grand Ole Opry a zawm a; a thih ní thlengin country mi pawimawh ber zínga mi a ni chho. Country Music Hall of Fame-ah kum 2002 khan, a zai thiam chher chhuah zínga hlawhtling bera chhàl ngam Dolly Parton ngei mai hian a lâwm lût a ni.

Kum 1960 atanga kum 1981 thleng ama pualin TV program, “The Porter Wagoner Show” chu kár tin tih chhuah thin a ni a. He show-ah hian amah Wagoner leh artist nghet, Norma Jean ten zaiin hun an hawng tlangpui thìn. Episodes tinah hian zai thiam khual tha (guest artist) an nei deuh ziah thin a; hla hnih-khat an sa tlângpui thin. Show tâwp lamah Pathian fakna hla (gospel) hmangin show an khâr thìn a ni.

Pangpâr kuh mûm ang Pârton-i

Kum 1967 a ni. Country superstar tùr Dolly Parton chuan a single hmasa ber, “Dumb Blonde” a ti chhuak a; country charts-ah #24 a hauh pha. A hnua a tih chhuah leh, “Something Fishy” chuan #17 din hmun a rawn hauh leh bawk. A bâk han inchhuanna chhan tùr êm êm chanchin ropui a la nei hran lo … tak tak! Hetih lai hian kum 21 mi chauh a la ni.

Hemi kum vêk May thla a inher a. A âw leh a zai a hriatin country music leh showbiz lama lâr mék, Porter Wagoner chuan Dolly Parton chu TV lama variety show hlawhtling tak a kalpui mêk, “The Porter Wagoner Show”-a artist nghet atán a sáwm ta tawp mai a. Hma lam hun dàwn vak ngaihna pawh la hre lo Dolly Parton tán chuan, “Aw le!” tia chhàn loh chi rual a ni lo. 

Hetih lai hian Wagoner-a’n zai thiam nghet a rawih lai, Norma Jean chuan a show hi a chhuahsan fel chiah a; Dolly Parton hian a rawn thlâk a ni. Kum 1994-a tih chhuah, Dolly Parton-in ama chanchin a ziahna (autobiography)-a a ziah dàn chuan, “Kha hun kha ka nuna hun pawimawh ber a ni… Mahse, a tìr chuan Wagoner-a show lo hluttute khân min lâwm tehchiam lo. A chhan chu an rilruah Norma Jean a la tlâk nat vàng a ni. Kei chu, Norma Jean thlâktu atán min pawm thei lo a ni,’ tiin. Mahse, Porter Wagoner-a tanpuina leh a zai thiam êm avàngin an pawm zui lo thei lo chiang e!

Wagoner-a zárah Parton-i a pár

Porter Wagoner chuan recording label lian ber zinga mi, RCA Victor hotute a nawrna zárah Dolly Parton chuan recording contract a ziak ve ta a. Mahse, RCA chuan a tìra risk lâk tawp chu ngam chiah loin an hnuaia a single hmasa ber tùr chu Porter Wagoner nèn duet-a tih chhuah an rèlsak ta a. 

Tom Paxton-a hla, “The Last Thing on My Mind” chu 1967 kum tàwp lamah an ti chhuak ta a; US Country charts-ah #7 hauh nghal­in a hla lehpek zawng zawng chu “hit” an kai chho ta zêl mai.

“Bitter sweet memories nên ka liam tâng e…”

Kum 1973 a ni ta. Parton-i chu pár tak a ni tawh. The Porter Wagoner Show-a kum nga chhúng chám tùra a tìra biak fel Dolly Parton chuan kum sarih a chám dáwn ta.

A hma lam hun a ngaihtuahin Dolly chuan Porter-a show chu chhuahsan hun tawhin a inhria a, solo artist-a kala hlawhtlinna duhawm zâwk zawn hunin a inhre ve ta.

Hetih laia Porter nèna an boruak chu “chhe tak” a ni! Khâk namén lohin a kha bawk! Hun kha leh chen, hlawhtlinna leh hmingthanna a chanpui, unau ang chiaha a lo en thin Porter hnênah chuan a show atanga chhuah a duh thu sawi nán, eng chhuanlam nge a siam tâk ang le?

Ama’n a sawi a; heti’n: ‘Khatih hun lai khán lungngaihna leh thinlung nat vawng vawng cháng ka ngah hle. Amah (Porter) nèn hian inanna deuh kan nei a: mi luhlul tak kan ni ve ve a. Ani kha mipa lung lian dik tak a ni,’ tiin 2011 khan CMT a hrilh a, ‘Engtin nge ka chawlh tùr thu hi ka hrilh ang? Min châwm liantu hriat thiam theih dàn tùra tawngkam hman tùr ka haih chham a ni! Ka tána hna ropui a thawh avànga ka làwmzia hrilh chungin engtin nge ka kalsan a ngaih thu hi ka sawi chhuah ang aw? tih chu keimah ka inzawhna lian ber a ni. Inah ka hâwng a. Ka ngaihtuah vang vang hnuah a tána ka tihsak theih tha ber nia ka hriat chu ka ti ta a: Ka thu a. Hla ka phuah ta ringawt mai a ni,’ tiin Dolly Parton chuan a sawi bawk.

Ni e, Porter Wagoner nèna zai lama an inkawp rialna chu chhut chhiat a ngai ta miau si a. Chuta hla, thinlung rüm, ngui leh nguai, chavai leh baihvai, mittui luang ngiai ngiai kára lo piang chhuak chu, “I Will Always Love You” ngei mai hi a ni.

‘A tûka kan inhmuh chuan, “Porter, thu teh,” tiin ka hrilh a. Dolly vëk chuan, “I ngaihthlâk ngei ngei tùr, i pualin hla ka phuah a nia,” tia sawiin, “I Will Always Love You” chu ka sa ta a. A insúm thei ta bîk lo, a tap chhuak hial!’ tiin Dolly Parton chuan a sawi.

Porter pawh chuan, ‘Aw le, ka show min kalsan chu i duhthlanna a ni si a, i kal a ngai si a nih hi! Mahse, he hla hi keimah ngeiin ka produce a ngai thung ang. A chhan chu, i hla phuah tawh zawng zawng zínga a tha ber a nih vàng a ni,’ a ti ta a. 

Parton-i pàrpui hla ropui chu

June 12, 1973-ah RCA Studio B, Nashville-ah “I Will Always Love You” chu record a ni ta a. March 18, 1974-ah tih chhuah a ni. Parton-i solo studio album 13-na “Jolene”-a a single tih chhuah pahnihna a ni bawk. 

Dolly Parton chuan Porter Wagoner show-a a hun hman hnuhnun ber tum, April 1974-ah he hla hi a sa a; thlírtute rilru a khawih dàn a dang ngaih ngaih kher mai. Chart-ah top a hauh zut zut mai! Hmeichhe artist zînga hla ngai, tum hnih #1 nihpui thei hmasa ber a ni a; tûnah Reba McEntire-in a rawn nih rual ve chauh. 1992 film, “The Bodyguard” sountrack atán Whitney Houston-i sak khan record rawn break-in, kár 14 chhúng Billboard Hot 100 chart-ah #1 a nihpui leh a, hmeichhe single tih chhuah zinga hralh hnem ber record Whitney khan a rawn siampui bawk a ni.

Sa ve ta lote…

Whitney Houston-in a sak hma hian Dolly Parton chuan Patti Labelle chu a hla hi record ve tùin a nawr thìn a. A chhan chu Patti hian a sa lungkuai thiam dáwn êma a hriat vàng a ni. Mahse, Patti Labelle hian a hnar a. A hnua Whitney Houston sak a ngaihthlâk lehin a inchhîr thu a sawi nasa hle.

Kum 1974 khan, a lâr vânglai hun hmang mêk, “King of Rock n Roll” Elvis Presley khan Country charts-a #1 hauh mék, “I Will Always Love You” chu sak ve a châk ngang mai a. A tìr chuan Parton-i pawh a phûr fu. Mahse, Elvis-a manager, Colonel Tom Parker nèn sum chungchángah an thu a inhmu ta lo hlauh mai a. Elvis hian a sa ta lo a ni. A inchhîr thu sawiin Parton-i chuan, ‘Ka thiam loh a ni. Zan khuain ka tap! Mi â ang maiah ka inchan a; mi dang pawn, “I â zo ta em ni? Elvis a nih hi!” min ti lawm lawm. Mahse, ka thinlung chhûng rilah hian phal lo tùra min turtu a awm tlat a, ka phal ta lo rëng a ni,’ tiin. ‘A hnu daihah Whitney Houston-in a sa ta a; ka mamawh aia tam sum a sa chhuak a, Elvis-a in Graceland leina daih zân a sa chhuak tho alâwm!’ tiin Dolly chu a fiam thu pah nghe nghe.

Inrem lehna leh inthen hlenna

An inthen hnu hian vawi tam tak Wagoner hi sum lamah a täl buai fo a. Mahse, a nau leh a thiannu Dolly Parton erawh chuan a tlàn chhiatsan ngai lo. Dolly Parton chanchin an ziahna pakhatah chuan Wagoner hi chhiah chungchánga buaina neia táng tùra tih a nih tumin Dolly hian a tlan (bail) chhuak a ni. Sum lama Wagoner a tlâk chhiat lai ber paw’n a production company a leisak leh mai a. A lak atangin phût lêt a nei ngai lo. 

‘Ka tâna a thil tih zozai kha ka hre reng a, a hnêna lawm thu ka sawi vena a ni,’ a ti mai thin. ‘Khatia kan kal hran hun chhûng zawng pawh khán kei chuan Porter hi ka hmangaih reng a; ani pawn min hmangaih reng tho. Hun a liam a, kan inzawm leh a, thian tha tak kan ni zui leh thei ta a ni,’ tiin Dolly Parton chuan a sawi bawk. Kum ruk an kal hran hnuah 1980 khan Dolly Parton leh Porter Wagoner te chu inrem lehin duet album, “Porter & Dolly” chu hemi kum hian an ti chhuak leh a ni.

Lung cancer avàngin October 28, 2007 khan Nashville-ah Porter Wagoner hi a boral a. A thih hma darkár hnih chhúng a kiangah Dolly Parton hi, Wagoner-a chhûngte bulah a thu ve a. Hmui phuna “I Will Always Love You” sa sep sep chungin Poter Wagoner chu a dawm hlum ta a ni.

November 1, 2007-ah The Grand Ole Opry House-ah a vuina inkhâwm buatsaih a ni a, Dolly Parton chuan a hla chuam hmangin a mentor leh unaupa anga a en reng thin hi, “a thlah tak tak” ta a ni. A hnu lawkah a theme park, “Dollywood”-ah Porter Wagoner pual leh amah hriat reng nân concert a buatsaih bawk.
‘Kan chhûngkaw hun pawimawh berah Dolly hi a hla ngai lo mai ni loin a awm ziah thin. Ka pa hnuk chah hma darkâr hnih chhûng a kianga a rawn thu khan kan chhûngkaw mi leh sa a nihzia a ti lang chiang hle a… Anni pahnih hi chu, thûk leh ril takah an inzawm tlat a, an inhmangaih tak zet a ni,’ tiin country host leh musician, Porter Wagoner fanu, Debra Wagoner chuan a sawi.

Ni e, thîp leh kha taka inhmuh châng ni te awm thin mah se, thinlunga mi hlû hi chu, hun hian an hlutna a ti zual telh telh thin a; Hmangaihna thûk leh fîr tak chuan, kan chhiat ber lai pawn min zui zêl thin a nih hi!

Nupui-pasal nei ve ve chunga nula tlangval inngaihzàwnna aia thûk zâwk hmangaihna neitu, Dolly leh Porter-te nun hi, he hla hian a va han phawk chhuak chiang tak êm aw…!

And I hope life will treats you kind
And I hope that you have all
That you ever dreamed of oh I do wish you joy
And I wish you happiness but above all this
I wish you love I love you.