Zawhna: Ka pu, nu kum 34 mi ka ni a, sinus nei ka ni a, ka fate hian an pian hlimin sinus an nei bawk a. Tunlai hian zing thawh hlim atang hian kan hahchhiau reng mai a, a ninawm khawp mai. Zai pawh hian a dam tha duh lo an ti si a, enkawl dam chi a ni em? Mahniin engtinnge kan inenkawl ve  theih ang? – Rini, Tuikual

Chhanna: “Sinus ka nei” tih lai hi kan sawifiah hmasa phawt ange. Kan hnar chhung bawr, kan hmai/biang zawn chhung lamah hian boruak khawltu, air pockets kan tih ang hi a awm a, chung chu paranasal sinus an ti a, lehlam lehlam ah hian a awm nual a ni. Heng sinus te hi kan hmai ruh a awm vek a ni a, kan boruak thawk luh te leh, kan hnar chhung bawr vel vawng tura duan a ni a, an tangkai em em a ni. Chuvangin a awmzia tak chu sinus hi kan nei vek tihna ani.

I rawn sawi tum hi mi tam takin an neih thin sinus chhung bang vung, “Sinusitis” zawk anih hmel a. Hetianga a lo vun hian boruak che vel a ti buai a, hnar a ping a, a chang leh hnaptui a insiam tam a, tin, beng te pawh a chhet thei hial thin a, mit te nen pawh a in zawm hlawm avangin mit thak, mit kham, mittui insiam tam te pawh a thlen thei a ni. Kan hnar chhung sinus bawrah hian beng nena inzawm­na eustachian tube a awm a, tin mittui luanna nen a in zawm bawk a ni.

Sinusitis hi nei duh bik an awm a, thil huat (allergy) nei ah te hian a awm hma bik a. Hah­chhiau vak vak te hi a thlen duh hle a ni. Hnar hnit vak vak te hian a ti vung thei a, tin hnar leh hrawk chhung infection a awm hian sinus te hi a ti ping thin a, chu chuan har ping, ri hriatna buai te a thlen fo bawk a ni. Chuvang chuan a a tih ziaawm nan hnar thlawr Nasibion te hi kan chawh a, chu chuan sinus boruak luhna kua lai kha a ti zau a, a chhunga tuiril inkhawl te a rawn luang chhuak a, a ziaawm phah fo thin a ni.

Infection vang te anih chuan antibiotic hmanga enkawl dam theih a ni a. Allergy vang anih erawh chuan kan thil huat zawng laka inven a pawimawh hle bawk. A bikin boruak hnawm, hmuar leh rim na te hian a thlen duh bik a. Boruak khu lutuk ah te hian sinus a in block duh bawk a. Chutiang lakah chuan inven a pawimawh. Meizial khu ah te hian a awm hma a, meizu mi kan awm chuan inchhunga zial zuk loh a pawimawh khawp bawk.

Allergy hi a thlentu common ber pawl anih vangin boruak inthlak hun lai hian a awm duh zual hle a. Chuvang chuan chutiang hunlai a inven a pawimawh a. Inchhung ah thawmhnaw ro tha lo/hnawng te hi dah loh a pawimawh a, thawmhnaw suk te pawh tih ro that a pawimawh hle. Neih laklawh chuan a rawn chhuak leh mai thin bawk a. Chuvangin zan mut dawna tuiso hu hnar a hip (steam inhalation) te hi a tangkai thei ang. Tin, vicks lam chi hi hman nasat lutuk a awm thei a, fimkhur deuh chu a tha.

Hnar bang kawi (deviated nasal septum) hi nei an awm fo a, chung ah chuan sinusitis hi a awm hma duh bawk. Engpawhnise, hnar lam thiam bik ENT Doctor te lo inentir ve thei ula, hnar leh hrawk chhung lamah fel lo a awm leh awm loh te check chiang se chu a tha hle.