Aizawl khawpui lailia Assam Rifles awm thin kha hmasawnna daltu nia hria in sawnchhuah tumin kum 40 dawn beih anih hnuah Zokhawsang lamah sawn an ni ta a. AR te kan ngaimawhna ber nia lang chu kan khawpui hmun zau tak mai an luah tlat te, kan duh hun huna kan infiamna hmunpui ber Lammual kan hmang thei lote kha a ni a. Hei mai bakah Assam Rifles te hi an chhuah chuan an awmna thin hmunah hian hmasawnna hna tam tak a thawh theih dawn nia hriatna avangin khawpui laili atanga sawn chhuah kha Mizo mipuite chuan kan duh vek niin a lang.

Hun engemaw chen hmalak anih hnuah AR te chu an insawn ta a. An chhuahsan ram tangkai taka hman anih theihnan chief minister kaihhruaina hnuaiah Assam Rifle ram chhuahsan hman zui dan tur ngaihtuahtu Advisory Committee din a ni ta a. Committee hian tangkai taka hman anih theihnan pawl leh mi thahnemngai hrang hrangte atangin an rawtna lutte an thlirho tawh a, 60.67% chu hmun hring (green area) ah siam nise, a bak chu hmasawnna hnathawh nan hman nise tiin an rel a ni.

Advisory Committee rel angin AR chhuahsan ram china kawngpui tih zauh leh siamthat hna thawh tura ruahman a niin hemi siamna tur sum pawh hmuh a ni a, hemi hmanga sawrkarin hmalak a tumnaah dodalna a awm ta a. High Court lamah thlen a niin Assam Rifles chhuahsan ram huam chhungah thing kit tawh rih lo turin Mizoram sawrkar a hriattir a, sawrkar chu AR chhuahsan ram chhunga thing upa tawh tak takte kih a tul chhan sawifiah turin a ti bawk.

Bungkawn leh Treasury Square inkar kawng hi meter 14-a zauh turin hma lak a ni a, hemi atan hian AR chhuahsan ram chhunga thing 174 kih tur ruahman a ni. Kan hriat angin AR chhuahsan ramah hian thing lian pui pui engemaw zat an awm a, a then phei chu upa tawh tak tak te an ni. Thing hi kan hriat angin mihringte mamawh oxygen petu an ni a, an hlut em avang hian humhalh hi an pawimawh em em a ni. Khawvel a lum tual tual a, boruak pawh a bawlhhlawh chho tial tial bawk. Hengte hi engvang nge kan tih chuan thing leh mau kan suat nasat lutuk vang a ni.

Thing leh mau hi an pawimawh a, Mizoramah pawh sawrkar hmalaknain kum tin thingphun uar tura inzirtirna hun hman thin a ni a, thing tiak pawh thahnem tak phun a ni tawh a ni. Hetih mek lai hian kan thing awmsa te hi chu kan humhalh a tul tak zet a, chutih rual erawh chuan kan mamawh atana kan hman erawh a tul chang a awm thin. Kan khawpui hi han en ila, sawrkar tan hma han lakna tur hmunhma a awm ta lo hle, department ram neih thinte kha mi thiltithei leh khawtlangin an neih sak nasa hle a.

Tuna hmasawnna hna thawh theihna tur chu Lammual leh a chhehvel hi a ni deuh mai awm e. Hmasawnna hna thawh dawn chuan a tha zawng leh chhe zawngin nghawng a nei vek a, khawi nge mipui tan hlawk zawk ang tih buk chunga hmalak a ngaih chang a awm thin. Lammual chhehvela thing kih hi a uiawm tak zet a, mahse hmasawnna daltu anih chuan ui tak chunga kih mai a ngaih pawhin hriatthiam hram tum tlang ang u.