ZALEN July 11, 2025 : Directorate of Disaster Management and Rehabilitation Conference Hall, Chawnpuiah Disaster Management and Rehabilitation Department hmalaknain vawiin khan khuarel chhiatna a lo thlen thulh a hman tur, Search & Rescue Equipments, inchhanchhuahna hmanrua chi hrang hrang sem chhuahna hun hman a ni.

Disaster Management & Rehabilitation Minister Prof. Lalnilawma chuan ‘Search & Rescue Equipments’-te semchhuahna hi a hmanpui a. Mizoram chhunga District Disaster Management Authority/Deputy Commissioner’s Office hrang hrang te, MAP leh IR Battalion hrang hrang a State Disaster Response Force te, Village Disaster Management Committee te leh NGO hrang hrang, YMA, MTP te hnenah sem chhuah a ni. 

Khuarel chhiatna chi hrang hrang a lo thlen thulha hman tangkai tur hmanrua chi 24 leh ralkhel dar Siren lian 12 leh Siren te 87 sem chhuah niin, heng hmanrua sem chhuah te hi a bikin tuitla chhanchhuahna leh a zawnna kawng a hman tur te, khampang leh inchhawng sang atang a inchhanchhuahna tur hmanrua te an ni.

Heng bak ah hian Indian Red Cross Society, Mizoram State Branch ten Disaster Management and Rehabilitation Department hnen a Blanket 300 an hlan chu Champhai District a hman turin sem chhuah nghal a ni bawk. 

DM&R Deputy Director K.Lalbiakfela chuan vawiina sem chhuah ‘Search & Rescue Equipments’ chungchangah report a pe a. ‘Leimin laka inven dan’ tih thupui hmanga Reels/video tawi insiamsakna result puan niin lawmman sem nghal a ni a, lawmman pakhatna dawngtu chu Spf 150x, Tanhril niin, pahnihna dawngtu chu Hlimen Branch KTP an ni a, pathumna dawngtu hi Chamlianzuala, Mission veng a ni. Mi pariat hnen ah Consolation prize pek a ni bawk.

Hmanrua DM&R in a semchhuah te chu a hnuai mi te hi an ni.