Aizawl: Aizawl khawpui chhunga No Telerance Drive/Checking (December 12-17, 2022) kalpui mekah nimin thleng khan lirthei dan bawhchhia 945 man a awm tawh a, chung mite pawisa chawi chu Rs 8,21,400 a tling a. Hetihlai hian police-te chuan Krismas leh kum thar vuakveta mipui himna atan hmalakna ngawrh takin an kalpui mek.

Traffic Control Room atanga ZALEN thudawn danin Aizawl traffic police leh Transport department-a enforcement staff-te chuan December 12 atang khan ngaihhnathiamna tel loa lirthei enfiahna, ‘No Tolerance Drive’ an kalpui tan a, hemi ni atanga nimin thlenga lirthei dan bawhchhia, a hmuna pawisa an chawitir (compound) zat chu 716 niin a hmun a pawisa chawi tur nei remchang lo, an document hrensak (seize) 229 an nei.

Traffic hotute chuan, Krismas leh kum thar mi tinin dam leh hlim tlang taka an hman theih nan Aizawl khawpui chhung remchang laiah dan bawhchhia, a bikin zu rui chunga lirthei khalh, zial zu chung leh mobile phone hmang chunga lirthei khalh, phur rit lutuk, lirthei chak lutuka khalh leh document fel leh fel lo an enfiah mek tih an sawi a, hei hi Krismas hma chuan ngawrh takin an kalpui zel dawn tih an sawi.

Kumin krismas leh 2023 kum thar hman turah mipui himna tur leh ralmuang taka hman a nih theihna turin tunlai hian chhun leh zanah police-ten hmalakna an kalpui ngawrh hle bawk a, lirthei veivak, a bikin zan lamah enfiah hna an kalpui mek a, a bikin rui chunga lirthei khalhte chu hremna pek an ni a. Hei bakah hian foot patrolling ngawrh taka kalpui mek a ni bawk.

Police hotute ruahmanna siam angin, Krismas bazar lun laiah mamawhte tana pan awlsam turin Aizawl Bazarpui hmunah Police Help Desk siam a ni tawh a, police te chuan Aizawl khawpui dai kawngpui dungte sawi lawk awm loa check thut thut turin ruahmanna an siam bawk.

No Tolerance Drive : Traffic/MVI te man zat (in Rs)
Day               Seize    Compound    Fine Amount
12.12.2022    53         80                  1,57,400
13.12.2022    39         72                  1,36,500
14.12.2022    33         134                1,65,000
15.12.2022    41         134                1,35,000
16.12.2022    8           128                1,42,500
17.12.2022    55         168                85,000
TOTAL          229       716               8,21,400