ZALEN June 24, 2026 : Vawiinah khan Thualthu khaw mipuite chuan Pathian hnena lawmthu sawi nan an thlai tharte khualzin hnenah a thlawnin an sem.

Thualthu YMA hruaitu pakhatin ZALEN a hrilh danin thlai thar sem chhuah runpui hi mipui atanga thurawn an dawn atangin Village Council (VC) leh All NGO-te chuan an ruahman a. Vawiin kha thlai thar sem chhuah hun atan an ruat a, khawtlang mipuite pawhin an ngaih hlutsak a, lo nei lo te pawhin an huan thlai mai bakah rawtuai leh mautuai te khawrhin an lo thawh a ni.

Thlai thar sem chhuah runpui hi Thualthu bazar-ah neih niin MHIP leh YMA ten khualzin te chhawnin vawiin nileng khan an buaipui a ni.

Thlai dawngtu khualzin pakhat chuan, "Hetianga Thualthu khaw mipuite tlawmngaihna leh luan chhuahna a taka ka tawng fuh hi vannei ka inti hle a ni. Midang tana malsawmna ni zel tur leh Pathian duhsakna dawng zel turin duhsakna ka hlan e," tiin ZALEN a hrilh.